Qytetarët dhe aktivistët që prej ditësh po protestojnë kundër projektit të investimit në Zvërnec kanë njoftuar zhvillimin e dy protestave të reja gjatë ditës së nesërme, një në Zvërnec dhe një tjetër në Tiranë.

Sipas organizatorëve, protesta e parë do të mbahet në orën 10:00 në Zvërnec, ndërsa në orën 18:00 qytetarët do të mblidhen sërish në Bulevardin “Dëshmorët e Kombit” në Tiranë.

Gjatë tubimit të zhvilluar para Kryeministrisë, një prej pjesëmarrëseve hodhi poshtë pretendimet për përçarje brenda protestës, duke theksuar se qëllimi dhe kërkesat e protestuesve mbeten të pandryshuara.

“Nesër në Zvërnec do të ketë protestë në orën 10:00, ndërsa pasdite, në orën 18:00, do të mblidhemi sërish në bulevard në Tiranë. Do të thonë se ka përçarje, por ne nuk jemi të përçarë. Kemi një kërkesë: Rama ik! Një protestë që nisi nga indinjata kur sheh se shteti është i pafuqishëm përballë kriminelit që tërheq zvarrë qytetarin, është shndërruar në një protestë që kërkon një Shqipëri më të mirë”, u shpreh ajo.

Protestuesit kanë deklaruar se mobilizimi do të vijojë edhe në ditët në vijim, ndërsa kundërshtojnë projektin e investimit në Zvërnec dhe kërkojnë ndryshime në politikat që lidhen me zonat e mbrojtura dhe qeverisjen e vendit.