Protesta kundër projektit të investimit në Zvërnec ka hyrë në ditën e saj të gjashtë, ndërsa qytetarë dhe aktivistë u mblodhën edhe këtë të diel përpara Kryeministrisë për të shprehur kundërshtimin e tyre ndaj nismës së qeverisë.

Pjesëmarrësit në tubim mbanin flamuj kombëtarë, flamuj me mbishkrimin “Autoktonë”, si dhe pankarta me mesazhe kritike dhe ironike drejtuar institucioneve. Gjatë protestës u ndezën edhe flakadanë, ndërsa protestuesit përsëritën thirrjet kundër projektit që parashikohet të zbatohet në zonën e Zvërnecit.

Tubimi u zhvillua në të njëjtën kohë me takimin që Kryeministri Edi Rama po mbante me banorët e Zvërnecit në Pallatin e Kulturës në Vlorë, ku po diskutohej mbi investimin e planifikuar dhe shqetësimet e ngritura nga komuniteti lokal.

Organizatorët e protestës kanë paraqitur pesë kërkesa kryesore drejtuar qeverisë, duke deklaruar se nuk pranojnë dialog me Kryeministrin Rama, por kërkojnë largimin e tij. Një tjetër kërkesë e tyre është anulimi i projektit të investimit në Zvërnec, si dhe shfuqizimi i ndryshimeve të fundit ligjore të miratuara për ligjin e zonave të mbrojtura.

Në përfundim të tubimit, organizatorët njoftuan se protestat do të vijojnë edhe në ditët në vijim, ndërsa u bënë thirrje qytetarëve që t’i bashkohen mobilizimit në sheshin përpara Kryeministrisë.