Një banor i Zvërnec i është drejtuar kryeministrit Edi Rama gjatë takimit të zhvilluar me komunitetin lokal, duke shprehur shqetësimin për një deklaratë të mëparshme të kreut të qeverisë lidhur me statusin e pronave në zonë.

Qytetari tha se prej 35 vitesh familja e tij ndodhet në procese gjyqësore për pronën që pretendon si të trashëguar dhe se një deklaratë e Ramës, sipas së cilës prona ishte “e trashëguar dembabadem”, e kishte shqetësuar dhe lënduar.

“Unë jam në gjyq për pronën pasnesër. Ju thatë para një jave që ajo pronë është e trashëguar dembabadem, ajo më vrau. U duk sikur çfarë të pres unë tani nga gjykata. Kam të drejtë mbi atë pronë apo jo, do e vendosë gjykata. Më kanë sorollatur 35 vite. Për 25 vite luftoi im atë derisa vdiq”, u shpreh banori.

Ai shtoi se fakti që familja e tij ka ndjekur rrugët ligjore dhe jo konfliktin nuk duhet të interpretohet si mungesë zëri apo të drejtash.

Në përgjigjen e tij, Rama sqaroi se deklarata e tij nuk kishte për qëllim të paragjykonte vendimmarrjen e gjykatës dhe kërkoi ndjesë nëse ishte keqkuptuar.

“Jo, nuk është e vërtetë. Unë kam thënë që prona është kthyer brez pas brezi, është kthyer shumë vite më parë dhe jo nga qeveria jonë. Pronat e kthyera janë prona të trashëguara, kështu funksionon ligji. A ka prona që janë kthyer gabimisht? Ka plot, por këtë nuk e vendos unë, e vendos vetëm gjykata. Ndjesë nëse je ndjerë i lënduar, por nuk më ke kuptuar”, deklaroi kryeministri.

Takimi u zhvillua në një klimë debati mbi projektin turistik që po planifikohet në zonën e Zvërnecit, ndërsa çështjet e pronësisë, zhvillimit ekonomik dhe mbrojtjes së mjedisit mbeten në qendër të diskutimeve mes banorëve dhe institucioneve.