Policia e Shtetit ka dhënë detaje zyrtare për ngjarjen e rëndë të regjistruar mëngjesin e së premtes në zonën e Kthesa e Kamzës, ku një efektiv i Policisë Rrugore u sulmua me thikë gjatë ushtrimit të detyrës.

Sipas njoftimit zyrtar, i arrestuari, Dorian Kaso, dyshohet se tentoi të vriste punonjësin e policisë dhe t’i merrte armën e shërbimit, ndërsa ky i fundit po menaxhonte trafikun pranë zonës së Casa Italia.

Ngjarja ka ndodhur rreth orës 08:20, kur 38-vjeçari iu afrua efektivit nga pas dhe i vendosi një thikë në fyt. Sipas policisë, ai tentoi gjithashtu t’i merrte armën e shërbimit, por u neutralizua menjëherë dhe u vu në pranga nga forcat policore.

Efektivi i Policisë Rrugore, Loren Rama, ka përshkruar momentet e sulmit në dëshminë e tij.

“Për një moment nuk po e kuptoja se kush ishte ky person, pasi nuk e njihja fare. Kur e pashë që më vendosi thikën në qafë, reagova menjëherë dhe e kapa me të dyja duart”, mësohet të ketë deklaruar ai.

Në vijim të veprimeve hetimore, specialistët për Hetimin e Krimeve të Rënda ndaj Personit arrestuan në flagrancë 38-vjeçarin për veprat penale “Vrasja e punonjësve të Policisë së Shtetit”, mbetur në tentativë, si dhe “Prodhimi, mbajtja, blerja apo shitja pa leje e armëve të ftohta”.

Gjatë ndërhyrjes u sekuestrua edhe mjeti prerës, thika e dyshuar e përdorur në sulm.

Autoritetet bëjnë me dije se materialet procedurale i janë referuar Prokuroria e Tiranës për veprime të mëtejshme hetimore, ndërsa motivet e ngjarjes mbeten ende të paqarta.

Njoftimi i Policisë

Tentoi të godiste me mjet prerës dhe t’i merrte armën e shërbimit një punonjësi të Policisë Rrugore në krye të detyrës, neutralizohet dhe vihet në pranga menjeherë autori.

Sekuestrohet mjeti prerës (thikë).

Specialistët për Hetimin e Krimeve të Rënda ndaj Personit arrestuan në flagrancë, për veprat penale “Vrasja e punonjësve të Policisë së Shtetit”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”, shtetasin D. K., 38 vjeç.

Më datë 05.06.2026, rreth orës 08:20, në afërsi të kthesës së Kamzës, 38-vjeçari në mënyrë të menjëhershme i ka vënë në fyt, mjetin prerës (thikë) që kishte me vete, një punonjësi të Policisë që ishte në krye të detyrës, duke menaxhuar trafikun rrugor.

Gjithashtu, 38-vjeçari ka tentuar t’i marrë efektivit, armën e shërbimit, por është neutralizuar dhe vënë menjëherë në pranga nga shërbimet e Policisë.

Materialet procedurale iu referuan Prokurorisë së Tiranës, për veprime të mëtejshme.