TIVAR – Në prag të nisjes së Samitit BE–Ballkani Perëndimor në Mal të Zi, Gjermania dhe Franca kanë paraqitur një dokument joformal (non-paper), ku propozojnë një strategji të re për integrimin gradual të vendeve të Ballkanit Perëndimor dhe Moldavisë në programet dhe politikat e Bashkimit Evropian.

Dokumenti franko-gjerman, i hartuar nga kabinetet e kancelarit gjerman Friedrich Merz dhe presidentit francez Emmanuel Macron, synon të përshpejtojë integrimin e vendeve kandidate duke u dhënë një shtysë të re reformave të brendshme përpara anëtarësimit me të drejta të plota.

Fokusimi te gjeopolitika dhe pavarësia evropiane

Në deklaratën e tij pas mbërritjes në ambientet e samitit në Tivar, presidenti francez Emmanuel Macron konfirmoi se propozimi i përbashkët do të jetë pjesë qendrore e diskutimeve me liderët e rajonit.

Macron vuri theksin te rëndësia strategjike e kësaj nisme, duke u shprehur: “Tani do të zhvillojmë bisedime me të gjitha vendet e Ballkanit Perëndimor për këtë çështje. Kjo është qartazi një nga lidhjet tona kryesore, së bashku me perspektivën e zgjerimit, e cila është jashtëzakonisht e rëndësishme edhe nga këndvështrimi gjeopolitik”.

Sipas kreut të shtetit francez, afrimi i shpejtë i rajonit me BE-në garanton pavarësinë evropiane në sektorë kyç si energjia, siguria dhe menaxhimi i përbashkët i rrugëve migratore.

Nisma e dytë e Berlinit brenda pak muajsh

Ky propozim shënon nismën e dytë të kancelarit gjerman Friedrich Merz brenda një kohe të shkurtër, pas propozimeve të tij të muajit maj për "zgjidhje kreative" në politikën e zgjerimit të bllokut.

Ky dokument shihet si një përpjekje e Berlinit dhe Parisit zyrtar për të testuar qëndrimet e shteteve anëtare dhe vendeve kandidate, pa krijuar detyrime formale juridike në këtë fazë të bisedimeve diplomatike.