POGRADEC – Presidenti i Republikës, Bajram Begaj, ka marrë pjesë këtë të premte në homazhet e zhvilluara në nderim të efektivit të policisë, Enea Mekolli, i cili humbi jetën një ditë më parë në krye të detyrës. Gjatë ceremonisë, kreu i shtetit është përballur me reagimin e ashpër dhe të revoltuar të xhaxhait të viktimës, i cili hodhi akuza direkte ndaj autoriteteve për situatën e rendit dhe sigurisë në vend.

Familjari i efektivit të ndjerë iu drejtua me tone të larta Presidentit Begaj, duke pretenduar se operacioni policor u ndërmor pa masat e duhura mbrojtëse. Përgjatë bashkëbisedimit të tensionuar, ai deklaroi se krimi po dominon mbi forcën e ligjit dhe se shteti ka dështuar të mbrojë punonjësit e tij në terren.

“Bëhuni zot, e latë vendin në dorë të kriminelëve. Po sundojnë kriminelet në çdo cep të Shqipërisë. Nuk dominion policia, por dominon krimi. Na fundosët, na mbyllët derën. E dërguat atje pa marrë masa mbrojtëse”, i ka thënë xhaxhai i Enea Mekollit presidentit Begaj.

Ngjarja tragjike ku humbi jetën efekti Mekolli ndodhi në zonën e Lozhanit në Maliq. Policia kishte rrethuar zonën për të ekzekutuar një urdhërarresti ndaj shtetasit Violand Braçellari, person i shpallur në kërkim, i cili gjatë ndërhyrjes hapi zjarr ndaj forcave të rendit.

Në ceremoninë e homazheve të mbajtura në Pogradec, përveç familjarëve, morën pjesë kolegë të shumtë të uniformave blu dhe krerë të institucioneve shtetërore për të përcjellë efektivin e rënë në krye të detyrës.