TIRANË – Bordi i Transparencës ka përcaktuar tarifat e reja tavan të tregtimit të karburanteve në vend gjatë mbledhjes së tij të radhës këtë të premte. Vendimi i ri, i cili reflekton lëvizjet e tregut, do të hyjë në fuqi zyrtarisht sot, më datë 5 qershor, në orën 13:00 dhe do të mbetet i vlefshëm deri në mbledhjen e ardhshme.

Sipas njoftimit zyrtar, çmimet maksimale të shitjes me pakicë dhe shumicë janë strukturuar si më poshtë:

Gazoili (Nafta SSH EN 590): Do të tregtohet me pakicë jo më shumë se 192 lekë/litër, ndërsa për shitjen me shumicë tavani është vendosur në 180 lekë/litër.

Benzina (SSH EN): Çmimi i shitjes me pakicë nuk duhet të kalojë 172 lekë/litër, ndërsa në tregun me shumicë do të jetë jo më shumë se 160 lekë/litër.

Gazoili për peshkim: Duke aplikuar përjashtimet ligjore për taksën e qarkullimit, karbonit dhe akcizës, çmimi për këtë sektor rezulton 96 lekë/litër.

Autoritetet sqarojnë se duke qenë se çmimet e tregut aktualisht qëndrojnë nën kufijtë e përcaktuar nga Akti Normativ (i cili parashikon ulje në 80% të akcizës vetëm nëse nafta kalon 220 lekë ose benzina 200 lekë), niveli i akcizës në këtë vendim do të zbatohet i plotë në masën 100%.

Bordi u ka bërë thirrje të gjithë operatorëve të shitjes me shumicë dhe pakicë të zbatojnë me rigorozitet këto dritare çmimesh. Në rast të konstatimit të shkeljeve, do të aplikohet masa administrative e pezullimit të menjëhershëm të aktivitetit.

Ky monitorim vjen si një angazhim i përbashkët i Ministrisë së Ekonomisë dhe Inovacionit, Ministrisë së Financave dhe Ministrisë së Infrastrukturës dhe Energjisë për të mbrojtur konsumatorët dhe për të ruajtur konkurrencën e ndershme në treg.

Njoftimi i Plotë:

Bordi i Transparencës në datë 5 Qershor 2026, në mbledhjen e radhës vendosi: Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 192 lekë/litri, ndërsa i shitjes me shumicë jo më shumë se 180 lekë/litër. Çmimi i shitjes me pakicë i nënproduktit benzinë e standardit SSH EN të jetë jo më shumë se 172 lekë/litri, ndërsa i shitjes me shumicë jo më shumë se 160 lekë/litër.

Çmimet e caktuara nga Bordi do të hynë në fuqi sot datë 5 ora 13.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes. Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi.

Në rast të shkeljeve të konstatuara nga operatorë të ndryshëm do të vendoset pezullimi i aktivitetit. Ministria e Ekonomisë dhe Inovacionit sëbashku me Ministrinë e Financave dhe Ministrinë e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe ruajtjes së parimeve të konkurrencës së ndershme në treg.

SQARIM: Referuar Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, ku është parashikuar, se në rast se çmimi i shitjes me pakicë, për gazoili është më i lartë se 220 lek/litri, apo për benzinën është më i lartë se 200 lek/litri, zbatohet niveli 80% i akcizës. Bazuar në zbatimin e metodologjisë për llogaritjen e çmimeve tavan te shitjes me pakice, çmimet janë nën kufirin e Aktit Normativ nr. 1, datë 3.4.2026, dhe për rrjedhojë niveli i akcizës do të zbatohet i plotë, 100%.

Gazoili për peshkim – çmimi i shitjes së gazoilit për peshkim, referuar Ligjit 9975, datë 28.07.2008 “Për taksat Kombëtare”, ne nenin Neni 9 “Përjashtimet nga pagimi i taksave kombëtare”, pika 6 parashikohet: …“Përjashtohen nga pagimi i taksës së qarkullimit dhe taksës së karbonit anijet e peshkimit. Gjithashtu referuar nenit 10, pika 3 germa “d” te Ligjit 61/2012 “Për akcizat në RSH” parashikohet përjashtimi nga detyrimet e akcizes i karburantit për anijet e peshkimit, në sasitë, kushtet dhe kriteret e përcaktuara në VKM. Referuar metodologjise së përcaktuar në aktin normativ, çmimi i shitjes së gazolit për peshkim rezulton 96 lekë.