POGRADEC – Qyteti i Pogradecit ka hapur sot dyert nën një atmosferë të rëndë zie dhe dhimbjeje për të përcjellë në banesën e fundit efektivin e Policisë së Shtetit, Enea Mekolli, i cili ra në krye të detyrës gjatë operacionit të djeshëm në fshatin Bode të Maliqit.

Homazhet zyrtare në nderim të figurës dhe sakrificës së tij kanë nisur në orën 10:00 në ambientet e Pallatit të Kulturës në Pogradec, ku qindra kolegë me lot në sy, autoritete lokale dhe qytetarë po kryejnë nderimet e fundit. Ceremonia zyrtare e përcjelljes së "Dëshmorit të Atdheut" është planifikuar të zhvillohet në orën 14:00.

Edhe pse statusi i lartë "Dëshmor i Atdheut" i mundësonte një vendprehje në Varrezat e Dëshmorëve, familja e të ndjerit ka bërë një kërkesë mjaft prekëse, duke kërkuar që ceremonia e lamtumirës dhe varrimi të bëhen në varrezat e vendlindjes së tij.

Ky vendim vjen pas një tragjedie të mëhershme që ka pllakosur këtë familje, e cila vite më parë ka humbur edhe një djalë tjetër, po ashtu efektiv policie, i cili u nda nga jeta parakohe si pasojë e një sëmundjeje të rëndë. Nisur nga kjo plagë e madhe, dëshira e fundit e familjarëve ka qenë që dy vëllezërit uniformëmbajtës të prehen pranë njëri-tjetrit në përjetësi.