Një ngjarje e rëndë ka ndodhur në orët e para të mëngjesit të sotëm në Tiranë, ku dy vëllezër me origjinë nga Laçi janë dhunuar nga persona ende të paidentifikuar, ndërsa njëri prej tyre ka mbetur i plagosur me armë zjarri. Të dëmtuarit janë identifikuar si shtetasit Klisman Rrapushi dhe Klaudio Gega.

Rreth orës 03:00 të mëngjesit, dy vëllezërit janë paraqitur në spital për të marrë ndihmë mjekësore. Sipas të dhënave, shtetasi Klisman Rrapushi ka pësuar një plagë në këmbë, e cila dyshohet se është shkaktuar nga armë zjarri, ndërsa vëllai i tij, Klaudio Gega, ka pësuar një ndrydhje në këmbë si pasojë e dhunës fizike. Fatmirësisht, të dy ndodhen jashtë rrezikut për jetën.

Sipas dëshmisë paraprake që ata kanë dhënë përpara uniformave blu, incidenti ka ndodhur në ambientet e jashtme të një subjekti në rrugën “Faik Konica” në kryeqytet, ku janë sulmuar nga disa persona të panjohur prej tyre.

Në njoftimin zyrtar të Policisë së Tiranës thuhet:

"Më datë 05.06.2026, rreth orës 03:00, janë paraqitur për ndihmë mjekësore, në spital, shtetasi K. Rr.(L.), banues në Laç, i dëmtuar në këmbë dyshohet me armë zjarri, dhe vëllai i tij, shtetasi K. G.(L.), i dëmtuar në këmbë (ndrydhur). Të dy shtetasit janë jashtë rrezikut për jetën, dhe kanë deklaruar se janë dëmtuar nga disa shtetas të panjohur prej tyre, në ambientet e jashtme të një subjekti në rrugën ‘Faik Konica’."

Aktualisht, grupi hetimor nën drejtimin e Prokurorisë ka nisur punën në terren, duke administruar provat dhe duke verifikuar kamerat e sigurisë në zonë, me qëllim identifikimin, kapjen e autorëve dhe sqarimin e plotë të rrethanave të këtij konflikti.