MALIQ – Detaje të reja janë bërë të ditura lidhur me ngjarjen e rëndë të ndodhur në Maliq, ku një efektiv policie humbi jetën dhe një tjetër mbeti i plagosur gjatë një përplasjeje të armatosur.

Efektivi i plagosur, Edison Adri, ndodhet i shtruar në Spitalin Universitar të Traumës në Tiranë, ku po merr trajtim të specializuar mjekësor. Burime spitalore bëjnë me dije se 36-vjeçari iu nënshtrua një ndërhyrjeje të vështirë kirurgjikale në zonën e nofullës.

Sipas mjekëve, pas operacionit gjendja shëndetësore e efektivit paraqitet stabël dhe ai vijon të mbahet nën monitorim të vazhdueshëm.

Ndërkohë, në të njëjtin spital po merr trajtim mjekësor edhe autori i dyshuar i ngjarjes, Violand Braçellari. Mësohet se ai ndodhet jashtë rrezikut për jetën, por do të vazhdojë të qëndrojë i shtruar për të marrë kujdesin e nevojshëm mjekësor për plagët e pësuara gjatë incidentit.

Për shkak të natyrës së rëndë të ngjarjes, ndaj Braçellarit janë vendosur masa të rrepta sigurie nga Policia e Shtetit në ambientet e spitalit.

Ndërkohë, grupi hetimor vijon punën për zbardhjen e plotë të rrethanave dhe motiveve që çuan në këtë ngjarje të rëndë.