TIRANË – Kreu i Partisë Demokratike, Sali Berisha, ka lëshuar akuza të ashpra ndaj Kryeministrit Edi Rama gjatë seancës së sotme plenare në Kuvend, duke e akuzuar atë për organizimin e një antimitingu në qytetin e Vlorës me qëllim përçarjen e protestës qytetare për çështjen e Zvërnecit.

Sipas Berishës, mazhoranca socialiste i ka dërguar mesazhe urdhëruese të gjithë punonjësve të administratës publike në zonën e Jugut, duke i detyruar që të dalin nesër në një kundërprotestë. Lideri i opozitës e ka krahasuar këtë strategji me metodat e periudhës së fundit të regjimit komunist.

“Denoncoj med forcën më të madhe vendimin e kreut të Meduzës, kreut të organizatës kriminale për të organizuar nesër në Vlorë antimitingun e turpshëm të historisë. Ju paralajmëroj se antimitingjet tuaja nuk do të tolerohen, do të marrin atë përgjigje që do të mjeroheni me të. Keni dërguar mesazh te të gjithë punonjësit e të gjithë Jugut, njësoj si Ramiz Alia që donte të shpallte Republikën e Vlorës me vullnetarët e Enverit. Tani janë vullnetarët e Edit”, deklaroi Berisha nga foltorja e parlamentit.

Më tej, kreu i demokratëve bëri me dije se ka publikuar tashmë mesazhet që sipas tij u janë nisur nënndarjeve të administratës. Ai i bëri thirrje kryeministrit të tërhiqet menjëherë dhe të anulojë këtë aktivitet, të cilin e cilësoi si një praktikë përçarëse, "fashiste dhe staliniste" që po përdoret si mjet presioni ndaj reagimit legjitim të qytetarëve.