TIRANË – Ish-futbollisti i njohur i Kombëtares shqiptare, Igli Tare, është marrë zyrtarisht i pandehur nga Prokuroria e Posaçme Kundër Korrupsionit dhe Krimit të Organizuar (SPAK). Ndaj tij është ngritur akuza e rëndë e "pastrimit të parave".

Komunikimi zyrtar i akuzës u bë paraditen e kësaj të enjteje, 4 qershor, pasi Tare u paraqit në ambientet e organit të akuzës në zbatim të fletëthirrjeve që i ishin dërguar më parë.

Mësohet se thirrja dhe marrja e tij si i pandehur është realizuar në kuadër të hetimeve të thelluara që SPAK po kryen për dosjen e ish-zëvendëskryeministres dhe ish-ministres së Infrastrukturës dhe Energjisë, Belinda Balluku.

Ish-zyrtarja e lartë, Belinda Balluku, është marrë më herët e pandehur nga prokurorët e posaçëm për akuzën e "shkeljes së pabarazisë në tendera", procedurë kjo që lidhet specifikisht me projektin e ndërtimit të tunelit të Llogarasë. Po ashtu, ish-ministrja ndodhet nën hetim edhe për procedurat e ndjekura në lotet e Unazës së Madhe të Tiranës, ndërkohë që paralelisht me hetimin penal, SPAK ka nisur ndaj saj edhe një hetim të imtësishëm pasuror.

Marrja e Igli Tares si i pandehur brenda të njëjtës dosje pritet të hedhë dritë mbi lidhjet dhe transaksionet e dyshimta financiare që kanë shërbyer si bazë për ngritjen e akuzës së pastrimit të parave.