TIRANË – Drejtori i Përgjithshëm i Policisë së Shtetit, Skënder Hita, ka dalë në një prononcim prekës për mediat përpara ambientit të Spitalit të Traumës në Tiranë, ku sapo ka mbërritur efektivi i plagosur rëndë në Maliq, Edison Adri.

Me tone të rënduara emocionale, kryepolici Hita e ka cilësuar ngjarjen e sotme si një ditë zie për mbarë uniformat e zeza, duke theksuar se institucioni që ai drejton ka humbur një ndër shërbëtorët e tij më të përkushtuar, inspektorin 34-vjeçar Enea Mekolli, i cili u ekzekutua gjatë aksionit në malin Boden.

“Policia e Shtetit humbi shërbëtorin e saj. Edhe një punonjës policie është i plagosur rëndë dhe po merr ndihmë mjekësore këtu te Trauma. Edhe personi në kërkim, gjatë shkëmbimit të zjarrit u plagos dhe ndodhet në spitalin e Korçës. Është vërtet një ngjarje ku nuk do doja të isha para jush”, u shpreh para gazetarëve drejtori Skënder Hita.

Kreu i Policisë konfirmoi se situata shëndetësore e efektivit të plagosur Edison Adri, 36 vjeç, mbetet serioze për shkak të plumbit që i ka përshkuar tejpërtej nofullën, por ai tashmë ndodhet nën kujdesin maksimal të ekipeve të specializuara të Traumës.

Nga ana tjetër, Hita rikonfirmoi se autori i kësaj masakre, ish-ushtaraku i shpallur në kërkim Violand Braçellari, ka mbetur i plagosur në dorë nga vetë reagimi i forcave të rendit dhe po merr mjekim në spitalin e Korçës, ku mbahet nën masa ekstreme izolimi përpara se të përballet me akuzat e rënda të vrasjes së punonjësit të policisë.