KORÇË – Kanë rënë në pranga dhe janë siguruar pamjet e momentit kur mbërrin nën masa ekstreme sigurie në spitalin e Korçës 43-vjeçari Violand Braçellari. Ai është autori i sulmit të përgjakshëm të mëngjesit të sotëm në malin Boden të Lozhanit, ku mbeti i vrarë në krye të detyrës inspektori i forcave “Shqiponja”, Enea Mekolli, 34 vjeç, dhe u plagos kolegu i tij, Edison Adri, 36 vjeç.

Braçellari, i cili mbeti i plagosur në dorë gjatë shkëmbimit të zjarrit me strukturat e policisë, është transportuar me urgjencë drejt spitalit rajonal për të marrë ndihmën mjekësore, ku dhe ndodhet nën monitorimin e rreptë të forcave të armatosura të rendit.

Fundi i arratisë së ish-ushtarakut që sfidoi 4 herë RENEA-n

Ky izolim në spital shënon edhe fundin e arratisë së gjatë të 43-vjeçarit, i cili konsiderohej një person me rrezikshmëri ekstremisht të lartë shoqërore. Hetimet e deritanishme konfirmojnë se Braçellari është një ish-ushtarak, fakt ky që shpjegon edhe aftësitë e tij taktike për t’u bërë ballë forcave të rendit. Për shkak të njohjes së mirë të zonës dhe trajnimit të tij specifik, ai kishte arritur t’u shpëtonte operacioneve të forcave speciale RENEA në katër raste të ndryshme, duke përdorur stanet dhe pyjet e thella të Maliqit si mburojë.

E kaluara e tij penale e pasur me precedentë kriminalë përfshin:

Viti 2011: Ndaj tij është caktuar masa e sigurisë “Arrest në burg” për veprën penale “Kultivimi i bimëve narkotike”.

Viti 2017: U dënua nga Gjykata e Korçës me 9 vjet, 11 muaj e 7 ditë burgim për "Prodhimi dhe shitja e narkotikëve" (vendim i lënë në fuqi nga Apeli dhe Gjykata e Lartë).

Së fundmi: Ishte shpallur në kërkim edhe për llogari të Policisë së Vlorës, si dhe ishte në gjyq e sipër për krime ndaj personit, konkretisht për një ngjarje plagosjeje.

Dinamika e përplasjes me armë në stan

Aksioni i sotëm nisi rreth orës 07:30, kur grupi operacional rrethoi stanin ku ai strehohej në malin Boden. Sapo ka diktuar lëvizjet e uniformave të zeza pranë perimetrit të rrethuar, ish-ushtaraku ka hapur zjarr të menjëhershëm, duke lënë të vdekur në vend 34-vjeçarin Enea Mekolli dhe duke plagosir efektivin tjetër, Edison Adri. Policia iu kundërpërgjigj sulmit duke e plagosur në dorë dhe duke bërë të mundur prangosjen e tij.

Në ambientet e spitalit të Korçës po vijojnë procedurat e ruajtjes dhe hetimit, ndërsa Agjencia e Mbikëqyrjes Policore (AMP) dhe Prokuroria po punojnë për dokumentimin e plotë ligjor të kësaj tragjedie.