MALIQ – Detaje të reja dhe tronditëse kanë dalë në dritë lidhur me profilin e autorit të sulmit të përgjakshëm në Maliq, ku mbeti i vrarë në krye të detyrës efekti i forcave “Shqiponja”, Enea Mekolli, dhe u plagos kolegu i tij, Edison Adri.

Violand Braçellari

Autori i dyshuar i ngjarjes, 43-vjeçari Violand Braçellari, rezulton të jetë një ish-ushtarak dhe një person me rrezikshmëri shumë të lartë shoqërore, i cili i fshihej drejtësisë prej vitit 2017. Sipas të dhënave, ai ishte shpallur në kërkim për llogari të Policisë së Vlorës, ndërsa njihej si person me precedentë të theksuar kriminalë në zonën e Maliqit.

Mësohet se për shkak të terrenit ekstremisht të vështirë malor ku fshihej dhe njohurive të tij taktike, Braçellari arriti t’u shpëtonte operacioneve të forcave speciale RENEA në katër raste të ndryshme. Ai përdorte një stan mbi fshatin Bodë si bazë, duke u futur me shpejtësi në pyll sapo pikaste lëvizje të forcave të rendit.

Dinamika e përplasjes dhe e kaluara kriminale

Ngjarja e sotme u regjistrua në orët e para të mëngjesit në zonën e thellë të malit Boden (Lozhan). Gjatë momentit që efektivët po i afroheshin stanit ku ai qëndronte, i rrethuar edhe nga qenë, Braçellari ka konstatuar lëvizjet e policisë dhe ka hapur menjëherë zjarr me armë zjarri. Nga breshëria, efektivi Enea Mekolli humbi jetën në vend, ndërsa polici tjetër Edison Adri mbeti i plagosur. Gjatë shkëmbimit të zjarrit mbeti i plagosur në dorë edhe vetë autori, i cili më pas u neutralizua.

Edison Adri

Violand Braçellari ishte dënuar përfundimisht nga Gjykata e Korçës në vitin 2017 me 10 vite burgim për veprën penale "Prodhimi dhe shitja e narkotikëve", vendim ky që ishte lënë në fuqi nga Gjykata e Apelit dhe Gjykata e Lartë. Përveç dënimit për drogë, 43-vjeçari ishte aktualisht në proces gjyqësor edhe për krime ndaj personit, konkretisht për një ngjarje plagosjeje.

Policia flet zyrtarisht për ngjarjen e rëndë

Korçë/ Humbet jetën në krye të detyrës, 1 punonjës policie, si dhe plagoset një tjetër punonjës policie, nga sulmi me armë zjarri nga një person i kërkuar i cili u neutralizua dhe u plagos gjatë shkëmbimit të zjarrit gjatë një operacioni për kapjen e tij

Korçë – Në zbatim të planit të masave për kapjen e personave në kërkim, bazuar dhe në informacionet e siguruara për vendndodhjen e një personi të kërkuar, me rrezikshmëri të lartë, shërbimet e Drejtorisë Vendore të Policisë Korçë, Komisariatit të Policisë Maliq dhe të Komisariatit të Policisë Korçë, kanë organizuar punën dhe kanë shkuar në zonën e Lozhanit, në malin Boden, Bashkia Maliq.

Rreth orës 07:30, shërbimet e Policisë kanë rrethuar vendin (stanin) ku dyshohej se fshihej personi në kërkim, konkretisht shtetasi Violand Braçellari, 43 vjeç, i dënuar në vitin 2017 me 9 vjet, 11 muaj e 7 ditë burgim nga Gjykata e Korçës, për veprën penale “Prodhimi dhe shitja e narkotikëve”, ndërsa në vitin 2011 ndaj tij është caktuar masa e sigurisë “Arrest në burg”, për veprën penale “Kultivimi i bimëve narkotike”.

Shërbimet e Policisë i kanë bërë thirrje të kërkuarit të dilte dhe të dorëzohej, por ai nuk i është bindur thirrjes së Policisë dhe ka hapur zjarr në drejtim të punonjësve të Policisë, ku për pasojë ka humbur jetën punonjësi i Policisë, inspektor Enea Mekolli, 34 vjeç, dhe ka mbetur i plagosur punonjësi i Policisë, inspektor Edison Adri 36 vjeç (të dy punonjës të Forcës së Posaçme “Shqiponja” të DVP Korçë).

Për të neutralizuar sulmin e të kërkuarit, shërbimet e Policisë i janë kundërpërgjigjur me armë zjarri dhe, si pasojë e shkëmbimit të zjarrit, ka mbetur i plagosur edhe i kërkuari, shtetasi Violand Braçellari, i cili më pas është arrestuar.

Në drejtim të vendit të ngjarjes është nisur helikopteri i shëndetësisë.

Grupi hetimor, nën drejtimin e Prokurorisë dhe në bashkëpunim me Agjencinë e Mbikëqyrjes Policore, po vijon punën për dokumentimin e plotë ligjor të kësaj ngjarjeje shumë të rëndë, ku humbi jetën në krye të detyrës një punonjës Policie dhe mbeti i plagosur një tjetër punonjës i Policisë.