KORÇË – Një ngjarje e rëndë ka tronditur zonën e Korçës, ku një punonjës policie ka humbur jetën në krye të detyrës dhe një tjetër ka mbetur i plagosur. Ngjarja e përgjakshme ndodhi gjatë një operacioni të organizuar për kapjen e një personi me rrezikshmëri të lartë shoqërore, i cili ka hapur zjarr ndaj forcave të rendit.

Sipas informacioneve zyrtare, shërbimet e Drejtorisë Vendore të Policisë Korçë, në bashkëpunim me Komisariatin e Maliqit dhe atë të Korçës, kishin lokalizuar vendndodhjen e të kërkuarit në zonën e Lozhanit, konkretisht në malin Boden të Bashkisë Maliq. Rreth orës 07:30, efektivët rrethuan një stan ku fshihej shtetasi Violand Braçellari, 43 vjeç.

Ndonëse policia i bëri thirrje të dorëzohej, 43-vjeçari nuk u bind dhe hapi zjarr në drejtim të uniformave të zeza. Si pasojë e të shtënave, humbi jetën inspektori Enea Mekollari, 34 vjeç, dhe u plagos inspektori Edison Adri, 36 vjeç, të dy pjesëtarë të Forcës së Posaçme “Shqiponja” në DVP Korçë.

Për të neutralizuar sulmin, shërbimet e policisë iu kundërpërgjigjën me armë zjarri, duke lënë të plagosur autorin Violand Braçellari, i cili më pas u vu në pranga. Për shkak të terrenit të vështirë dhe urgjencës mjekësore, drejt vendngjarjes është nisur një helikopter i shëndetësisë për të transportuar të plagosurit.

Autori i këtij sulmi, Violand Braçellari, është një person me precedentë të theksuar kriminalë. Ai rezulton i dënuar në vitin 2017 nga Gjykata e Korçës me 9 vjet, 11 muaj e 7 ditë burgim për veprën penale "Prodhimi dhe shitja e narkotikëve", si dhe ndaj tij ishte caktuar masa e sigurisë “Arrest në burg” që prej vitit 2011 për "Kultivimi i bimëve narkotike".

Grupi hetimor, nën drejtimin e Prokurorisë dhe në bashkëpunim med Agjencinë e Mbikëqyrjes Policore (AMP), po vijon punën në vendngjarje për dokumentimin e plotë ligjor të kësaj ngjarjeje të rëndë.

Policia flet zyrtarisht për ngjarjen e rëndë

Violand Braçellari

Enea Mekolli

Edison Adri

Korçë/ Humbet jetën në krye të detyrës, 1 punonjës policie, si dhe plagoset një tjetër punonjës policie, nga sulmi me armë zjarri nga një person i kërkuar i cili u neutralizua dhe u plagos gjatë shkëmbimit të zjarrit gjatë një operacioni për kapjen e tij

Korçë – Në zbatim të planit të masave për kapjen e personave në kërkim, bazuar dhe në informacionet e siguruara për vendndodhjen e një personi të kërkuar, me rrezikshmëri të lartë, shërbimet e Drejtorisë Vendore të Policisë Korçë, Komisariatit të Policisë Maliq dhe të Komisariatit të Policisë Korçë, kanë organizuar punën dhe kanë shkuar në zonën e Lozhanit, në malin Boden, Bashkia Maliq.

Rreth orës 07:30, shërbimet e Policisë kanë rrethuar vendin (stanin) ku dyshohej se fshihej personi në kërkim, konkretisht shtetasi Violand Braçellari, 43 vjeç, i dënuar në vitin 2017 me 9 vjet, 11 muaj e 7 ditë burgim nga Gjykata e Korçës, për veprën penale “Prodhimi dhe shitja e narkotikëve”, ndërsa në vitin 2011 ndaj tij është caktuar masa e sigurisë “Arrest në burg”, për veprën penale “Kultivimi i bimëve narkotike”.

Shërbimet e Policisë i kanë bërë thirrje të kërkuarit të dilte dhe të dorëzohej, por ai nuk i është bindur thirrjes së Policisë dhe ka hapur zjarr në drejtim të punonjësve të Policisë, ku për pasojë ka humbur jetën punonjësi i Policisë, inspektor Enea Mekolli, 34 vjeç, dhe ka mbetur i plagosur punonjësi i Policisë, inspektor Edison Adri 36 vjeç (të dy punonjës të Forcës së Posaçme “Shqiponja” të DVP Korçë).

Për të neutralizuar sulmin e të kërkuarit, shërbimet e Policisë i janë kundërpërgjigjur me armë zjarri dhe, si pasojë e shkëmbimit të zjarrit, ka mbetur i plagosur edhe i kërkuari, shtetasi Violand Braçellari, i cili më pas është arrestuar.

Në drejtim të vendit të ngjarjes është nisur helikopteri i shëndetësisë.

Grupi hetimor, nën drejtimin e Prokurorisë dhe në bashkëpunim me Agjencinë e Mbikëqyrjes Policore, po vijon punën për dokumentimin e plotë ligjor të kësaj ngjarjeje shumë të rëndë, ku humbi jetën në krye të detyrës një punonjës Policie dhe mbeti i plagosur një tjetër punonjës i Policisë.