Kush janë inspektorët e policisë dhe i kërkuari i ngjarjes së rëndë

Personi i shumëkërkuar Violand Braçellari 43 vjeç, që ishte rrethuar nga policia në Lozhan të Maliqit në Korçë, ka mbetur i plagosur dhe është dërguar në gjendje të rëndë në spitalin rajonal, raporton noa.al pasi mori konfirmim zyrtar nga Policia e Korçës.

Policia kishte rrethuar pyllin pranë zonës së Podesës pasi kishte informacion se ai jetonte i fshehur atje prej rreth dy vitesh.

Pylli i Podesës i njohur dhe si pylli i Fazanëve ndodhet 1 km larg fshatit Drithas dhe

Në këtë ngjarje që ndodhi rreth orës 07.30 të mëngjesit të sotëm, ka vdekur inspektor Enea Mekolli i repartit Shqiponja i cili dyshohet se është qëlluar me armë zjarri nga personi në kërkim.

Gjithashtu një tjetër agjent policie, Edison Adri, ka mbetur i plagosur rëndë.

Policia flet zyrtarisht për ngjarjen e rëndë

Korçë/ Humbet jetën në krye të detyrës, 1 punonjës policie, si dhe plagoset një tjetër punonjës policie, nga sulmi me armë zjarri nga një person i kërkuar i cili u neutralizua dhe u plagos gjatë shkëmbimit të zjarrit gjatë një operacioni për kapjen e tij

Korçë – Në zbatim të planit të masave për kapjen e personave në kërkim, bazuar dhe në informacionet e siguruara për vendndodhjen e një personi të kërkuar, me rrezikshmëri të lartë, shërbimet e Drejtorisë Vendore të Policisë Korçë, Komisariatit të Policisë Maliq dhe të Komisariatit të Policisë Korçë, kanë organizuar punën dhe kanë shkuar në zonën e Lozhanit, në malin Boden, Bashkia Maliq.

Rreth orës 07:30, shërbimet e Policisë kanë rrethuar vendin (stanin) ku dyshohej se fshihej personi në kërkim, konkretisht shtetasi Violand Braçellari, 43 vjeç, i dënuar në vitin 2017 me 9 vjet, 11 muaj e 7 ditë burgim nga Gjykata e Korçës, për veprën penale “Prodhimi dhe shitja e narkotikëve”, ndërsa në vitin 2011 ndaj tij është caktuar masa e sigurisë “Arrest në burg”, për veprën penale “Kultivimi i bimëve narkotike”.

Shërbimet e Policisë i kanë bërë thirrje të kërkuarit të dilte dhe të dorëzohej, por ai nuk i është bindur thirrjes së Policisë dhe ka hapur zjarr në drejtim të punonjësve të Policisë, ku për pasojë ka humbur jetën punonjësi i Policisë, inspektor Enea Mekolli, 34 vjeç, dhe ka mbetur i plagosur punonjësi i Policisë, inspektor Edison Adri 36 vjeç (të dy punonjës të Forcës së Posaçme “Shqiponja” të DVP Korçë).

Për të neutralizuar sulmin e të kërkuarit, shërbimet e Policisë i janë kundërpërgjigjur me armë zjarri dhe, si pasojë e shkëmbimit të zjarrit, ka mbetur i plagosur edhe i kërkuari, shtetasi Violand Braçellari, i cili më pas është arrestuar.

Në drejtim të vendit të ngjarjes është nisur helikopteri i shëndetësisë.

Grupi hetimor, nën drejtimin e Prokurorisë dhe në bashkëpunim me Agjencinë e Mbikëqyrjes Policore, po vijon punën për dokumentimin e plotë ligjor të kësaj ngjarjeje shumë të rëndë, ku humbi jetën në krye të detyrës një punonjës Policie dhe mbeti i plagosur një tjetër punonjës i Policisë.