Bizneset kanë në dispozicion vetëm edhe dy ditë për të aplikuar për përfshirjen në skemën e Marrëveshjes së Paqes Fiskale, ndërsa administrata tatimore ka bërë të qartë se nuk parashikohet asnjë shtyrje e afatit për dorëzimin e kërkesave.

Aplikimet, të cilat nisën më 15 maj 2026, mbyllen zyrtarisht më 5 qershor. Kërkesat për përfshirje në skemë duhet të paraqiten përmes platformës elektronike e-Filing.

Burime nga administrata tatimore bëjnë me dije se zgjatja e afatit nuk është në shqyrtim, pasi një vendim i tillë do të ndikonte në periudhën minimale njëvjeçare të zbatimit të marrëveshjes për tatimpaguesit.

Gjatë një takimi informues me bizneset anëtare të Dhomës Gjermane të Industrisë dhe Tregtisë në Shqipëri (DIHA), përfaqësues të Drejtorisë së Përgjithshme të Tatimeve sqaruan se respektimi i afateve aktuale është i domosdoshëm për funksionimin e skemës sipas parashikimeve ligjore.

Megjithatë, kërkesat për shtyrje të afateve janë artikuluar nga ekspertë të fushës së kontabilitetit dhe auditimit. Audituesi ligjor Bujar Bendo ka argumentuar se miratimi me vonesë i udhëzimeve zbatuese ka kufizuar ndjeshëm kohën në dispozicion të bizneseve për t’u përgatitur, duke rrezikuar zbatimin efektiv të procesit.

Në të njëjtën linjë është shprehur edhe eksperti i kontabilitetit Sotiraq Dhamo, i cili ka vlerësuar se afatet aktuale janë tepër të shkurtra për t’u dhënë mundësi subjekteve të përfitojnë nga mekanizmat e faljes së detyrimeve dhe gjobave.

Interes i kufizuar nga bizneset

Ndërkohë, Drejtoria e Përgjithshme e Tatimeve ka njoftuar se procesi i verifikimit të dokumentacionit të aplikantëve do të përfundojë deri më 10 qershor 2026.

Sipas informacioneve paraprake, interesi i bizneseve për t’u bërë pjesë e Marrëveshjes së Paqes Fiskale mbetet i ulët, pavarësisht lehtësive që ofron skema.

Mundësi për rideklarimin e pasqyrave financiare

Një nga elementët kryesorë të marrëveshjes është mundësia e rideklarimit të pasqyrave financiare për vitet 2023–2025, kundrejt pagesës së një tatimi prej 5%.

Administrata tatimore ka sqaruar se ky proces mund të kryhet vetëm një herë dhe duhet të përfundojë deri më 30 qershor 2026. Kushti themelor është që biznesi të ketë nënshkruar paraprakisht Marrëveshjen e Paqes Fiskale.

Subjektet mund të korrigjojnë deri në 30% të zërave të aktiveve, detyrimeve dhe kapitaleve pa penalitete apo kamatëvonesa, duke paguar vetëm tatimin prej 5% për ndryshimet e deklaruara. Të gjitha procedurat kryhen nëpërmjet sistemit elektronik e-Filing.

Çfarë synon Paqja Fiskale?

Ligji për Marrëveshjen e Paqes Fiskale synon të nxisë përmbushjen vullnetare të detyrimeve tatimore, të formalizojë ekonominë dhe të reduktojë informalitetin. Gjithashtu, ai parashikon krijimin e një marrëdhënieje më bashkëpunuese ndërmjet administratës tatimore dhe tatimpaguesve.

Megjithatë, ligji nuk përfshin amnisti për veprat penale që lidhen me pastrimin e parave, mashtrimet fiskale apo fshehjen e të ardhurave.

Sipas afateve të përcaktuara, draft-marrëveshjet do të përgatiten deri më 10 qershor, ndërsa tatimpaguesit duhet t’i pranojnë dhe t’i ngarkojnë në sistemin e-Filing jo më vonë se 15 qershori. Kësti i parë i pagesës duhet të shlyhet deri më 30 qershor 2026.

Ekspertët vlerësojnë se javët e ardhshme do të jenë vendimtare për të kuptuar shkallën reale të pjesëmarrjes së bizneseve në këtë proces, i cili konsiderohet një nga nismat më të rëndësishme fiskale të viteve të fundit.