LONDËR – Këngëtarja me famë botërore, Dua Lipa, ka kurorëzuar në fshehtësi martesën e saj me aktorin Callum Turner, në një ceremoni private të mbajtur më 31 maj në ndërtesën historike „Old Marylebone Town Hall“ në Londër. Ndonëse ceremonia u karakterizua nga një stil minimalist dhe larg syrit të mediave, bizhuteritë e zgjedhura nga artistja kanë tërhequr vëmendjen e të gjithë botës së modës.

Fituesja e çmimeve Grammy u shfaq në altar e veshur me një kostum të bardhë elegant nga shtëpia e modës „Schiaparelli“, të kombinuar me doreza transparente dhe një kapelë dramatike – një zgjedhje kjo që riktheu stilin ikonik të viteve ’70 të Bianca Jagger.

Megjithatë, detaji që la pa fjalë të pranishmit ishte gjerdani i saj. Dua Lipa mbante në qafë një krijim luksoz të koleksionit „Bulgari Serpenti“, i punuar plotësisht në ar të bardhë dhe i mbuluar me diamante.

Sipas ekspertëve të bizhuterive, ky model unik përmban mbi 75 karatë diamante, ku sytë e gjarprit janë të zbukuruar me gurë të çmuar në formë dardhe. Vlera e këtij gjerdani në tregun e luksit vlerësohet rreth 430 mijë funte sterlina, apo afërsisht 497 mijë euro, duke e kthyer këtë aksesor në elementin më të shtrenjtë të dasmës së thjeshtë të yllit të popit.