Grupi legjendar amerikan i rock-ut Metallica ka vendosur një rekord të ri në Berlin, duke mbledhur rreth 94 mijë spektatorë në koncertin e zhvilluar në Olympiastadion Berlin.

Sipas organizatorëve, ky është numri më i madh i publikut ndonjëherë në këtë stadium ikonik, i cili zakonisht ka një kapacitet prej rreth 73 800 vendesh për ndeshje futbolli.

Rekordi u arrit falë një skene të vendosur në qendër të stadiumit, në formë unaze, që lejoi shfrytëzimin maksimal të hapësirës dhe afrimin e fansave pranë artistëve.

Grupi doli në skenë rreth orës 20:00 dhe performoi për afro dy orë, duke përfshirë këngë nga albumi i fundit “72 Seasons”, si dhe hitet klasike “Nothing Else Matters” dhe “Enter Sandman”.

Një nga momentet më të veçanta të mbrëmjes ishte interpretimi i këngës “Sonne” si homazh për grupin gjerman Rammstein, me publikun që këndoi në kor.

Koncerti në Berlin shënoi edhe përmbylljen e pjesës gjermane të turneut botëror “M72 World Tour”, i cili ka vijuar për disa vite dhe ka mbledhur mijëra fansa në qytete të ndryshme europiane.