Greqi / Maqedoni e Veriut – Autoritetet greke kanë ndërmarrë një paketë masash për të përshpejtuar procedurat në pikat kufitare me Maqedonia e Veriut, me qëllim shmangien e radhëve të gjata dhe vonesave që janë krijuar për shkak të fluksit të lartë të udhëtarëve në prag të sezonit veror.

Masat fokusohen kryesisht në përmirësimin dhe forcimin e sistemeve informatike në pikat kufitare Evzoni dhe Dojran, me synim realizimin më të shpejtë të kontrolleve dhe lehtësimin e qarkullimit të automjeteve dhe udhëtarëve.

Sipas mediave, shkak kryesor i ngadalësimeve është zbatimi i sistemit të ri evropian Entry/Exit System (EES), i cili parashikon verifikime elektronike dhe biometrike për të gjithë udhëtarët që hyjnë në zonën e Shengenit. Ky proces, veçanërisht për hyrjet e para, kërkon regjistrim të të dhënave dhe identifikim biometrik, duke rritur kohën e pritjes në kufi.

Zyrtarët maqedonas dhe grekë kanë zhvilluar takime për koordinimin e masave, ku është theksuar nevoja për përmirësim të bashkëpunimit ndërinstitucional dhe menaxhim më efikas të fluksit të madh të udhëtarëve dhe tregtisë.

Zëvendësministri i Brendshëm i Maqedonisë së Veriut, Konstantinos Gulekas, ka deklaruar se rritja e lëvizjes turistike dhe kontrollet e reja të BE-së po krijojnë vonesa të konsiderueshme, duke bërë të domosdoshëm koordinimin e mëtejshëm mes palëve.

Ndërkohë, ministri grek për Mbrojtjen e Qytetarëve, Mihalis Hrisohodis, ka theksuar se Greqia është e detyruar të zbatojë rregulloret evropiane, ndërsa ka pranuar se infrastruktura e vjetëruar në disa pika kufitare mbetet një nga sfidat kryesore.

Masat e reja pritet të hyjnë në fuqi menjëherë, në përpjekje për të shmangur përsëritjen e radhëve kilometrike të viteve të fundit gjatë sezonit turistik veror.