Ish-piloti i Formula 1, Ralf Schumacher, po përgatitet të kurorëzojë dashurinë e tij me partnerin Étienne Bousquet-Cassagne, në një ceremoni që do të zhvillohet këtë fundjavë në Saint-Tropez të Francës.

Vëllai më i vogël i legjendës së Formula 1, Michael Schumacher, konfirmoi zyrtarisht fejesën përmes një postimi të përbashkët në Instagram, duke ndarë lajmin e shumëpritur me ndjekësit e tij.

Çifti publikoi një fotografi ku shfaqen të buzëqeshur duke ngritur gotat për një dolli, ndërsa në mesazhin e tyre shprehën lumturinë për mbështetjen dhe urimet e shumta që kanë marrë.

Sipas mediave të huaja, ceremonia e martesës do të mbledhë rreth 110 të ftuar. Mes tyre do të jenë edhe ish-bashkëshortja e Ralf Schumacher, Cora Schumacher, si dhe djali i tyre, David Schumacher. Ky i fundit ka zbuluar se për të gjithë të ftuarit është vendosur një kod i veçantë veshjeje për ditën e madhe.

Martesa do të pasqyrohet edhe në një dokumentar televiziv me titull “Ralf & Étienne: We Say Yes”, i cili do të transmetohet nga Sky Deutschland dhe platforma WOW. Dokumentari do të ndjekë çiftin gjatë përgatitjeve për ceremoninë, por edhe në jetën e tyre të përditshme në jug të Francës.

Partneri i Schumacher, Étienne Bousquet-Cassagne, përpara se të angazhohej në biznes, ka qenë aktiv në politikën franceze dhe ka pasur lidhje me Frontin Kombëtar, partinë e Marine Le Pen.

Ralf Schumacher bëri publike lidhjen e tij me Étienne Bousquet-Cassagne në korrik të vitit 2024, duke u bërë një nga figurat e pakta të Formula 1 që ka folur hapur për orientimin e tij seksual. Që prej asaj kohe, çifti ka ndarë shpesh momente nga jeta e tyre së bashku, ndërsa tani janë gati të hedhin hapin më të rëndësishëm në marrëdhënien e tyre.