“Hëna Blu” shfaqet sonte në qiell, fenomeni i rrallë rikthehet pas gjashtë vitesh

Qielli i natës së 31 majit do të dhurojë një spektakël të veçantë astronomik, pasi do të shfaqet e ashtuquajtura “Hëna Blu”, një fenomen relativisht i rrallë që ndodh kur brenda të njëjtit muaj kalendarik regjistrohen dy hëna të plota.

Edhe pse quhet “Hëna Blu”, sateliti natyror i Tokës nuk do të marrë ngjyrë blu. Ky emërtim përdoret për të përshkruar hënën e dytë të plotë që shfaqet brenda të njëjtit muaj.

Muaji maj nisi me një hënë të plotë më 1 maj, e njohur si “Hëna e Luleve”, ndërsa sonte do të ndodhë hëna e dytë e plotë e muajit, duke krijuar fenomenin e “Hënës Blu”.

Astronomët bëjnë me dije se kjo do të jetë gjithashtu një “mikrohënë”, pasi Hëna do të ndodhet në pikën më të largët nga Toka. Për këtë arsye ajo do të duket pak më e vogël se zakonisht, rreth 7 për qind më e vogël se një hënë e plotë mesatare dhe deri në 14 për qind më e vogël se një superhënë.

Fenomeni konsiderohet i veçantë pasi nuk ndodh shpesh. Sipas llogaritjeve astronomike, “Hëna Blu” e ardhshme do të shfaqet vetëm më 21 gusht të vitit 2032.

Për admiruesit e astronomisë dhe vëzhguesit e qiellit, mbrëmja e sotme ofron një mundësi të rrallë për të parë nga afër një nga fenomenet më interesante të kalendarit astronomik.