TIRANË — Aktori Indri Shiroka është konkurrenti i radhës që ka ndërprerë përfundimisht garën në spektaklin "Ferma Vip 3", pas një përballjeje në televotim me Klevisën. Shiroka rezultoi më pak i votuari nga publiku, duke mbyllur kështu rrugëtimin e tij në këtë reality show.

Mbrëmja e eliminimit nisi me një sfidë mes tre personazheve më pak të preferuar, ku krahas Indrit dhe Klevisës, e rrezikuar ishte edhe Kostana. Kjo e fundit arriti të triumfonte në sfidën direkte, duke siguruar qëndrimin në shtëpi. Pas këtij momenti, aktori shprehu dëshirën për t’u larguar menjëherë nga gara, mirëpo pas këmbënguljes së moderatores Arbana Osmani, ai pranoi t’i nënshtrohej televotimit "kokë më kokë" me Klevisën, proces i cili vulosi edhe eliminimin e tij.

Përtej eliminimit, mbrëmja u karakterizua nga debate të ashpra me tone mjaft të larta. Shkak u bë një letër e shkruar nga Indri për partneren e tij, Vanesën, ku i kërkonte ndarjen, veprim ky që u kritikua ashpër nga banorja tjetër, Sara. Sipas kësaj të fundit, një vendim i tillë personal duhej të merrej jashtë kamerave dhe jo përmes ekranit televiziv, duke e cilësuar sjelljen e aktorit si të papranueshme.

Nga ana e tij, Shiroka reagoi ashpër ndaj akuzave, duke e cilësuar Sarën si "komplet falso" dhe duke u shprehur se kishte konsumuar të gjithë energjinë për shkak të debateve të vazhdueshme gjatë javës. Ky debat ndau edhe pjesën tjetër të fermerëve, ku disa e konsideruan veprimin e aktorit si zgjedhje personale që nuk duhej gjykuar, ndërsa të tjerë vlerësuan sinqeritetin e tij pavarësisht rrethanave dhe momentit të përzgjedhur.