Komuniteti Mysliman i Shqipërisë ka reaguar ndaj debatit të krijuar pas publikimit të një udhëzimi të Ministria e Shëndetësisë që parashikon mundësinë e nisjes së terapisë hormonale për të miturit në kushte të caktuara.

Në një deklaratë publike, KMSH shpreh shqetësimin e saj lidhur me përmbajtjen e dokumentit, duke veçuar pjesën ku thuhet se terapia mund të nisë nga mosha 16-vjeçare, ndërsa në raste të veçanta mund të konsiderohet edhe nga mosha 14 vjeç.

Sipas Komunitetit Mysliman, çështje të tilla prekin drejtpërdrejt zhvillimin fizik, emocional dhe psikologjik të fëmijëve dhe adoleshentëve, ndaj kërkojnë trajtim me përgjegjësi të lartë institucionale dhe ndjeshmëri ndaj vlerave të shoqërisë shqiptare.

Në reagimin e tij, KMSH shpreh kundërshtimin ndaj çdo qasjeje që, sipas saj, hap rrugën për ndërhyrje hormonale në mosha të reja, duke argumentuar se të miturit ndodhen në një fazë të rëndësishme të formimit të identitetit dhe personalitetit.

“Fëmijët kanë nevojë për mbrojtje, orientim, mbështetje familjare dhe kujdes profesional të përgjegjshëm”, thuhet në deklaratë.

Më tej, institucioni fetar thekson se shoqëria shqiptare nuk duhet të normalizojë praktika që, sipas vlerësimit të tij, krijojnë paqartësi dhe tensione në raport me familjen, edukimin dhe konceptin e natyrës njerëzore.

KMSH u bën thirrje institucioneve shtetërore, profesionistëve të shëndetësisë, prindërve dhe aktorëve të tjerë shoqërorë që çështje të tilla të trajtohen përmes një debati të gjerë dhe të përgjegjshëm, larg ndikimeve ideologjike dhe vendimmarrjeve të nxituara.

Në përfundim të reagimit, Komuniteti Mysliman i Shqipërisë deklaron se mbështet shqetësimet e prindërve dhe besimtarëve që kërkojnë mbrojtjen e fëmijëve, ruajtjen e vlerave familjare dhe respektimin e ndjeshmërive morale e kulturore të shoqërisë shqiptare.