TIRANË, 29 Maj 2026 – Këngëtarja e njohur Soni Malaj ka thyer heshtjen duke folur për herë të parë hapur mbi arsyet e vërteta që çuan në përfundimin e historisë së saj të dashurisë me kantautorin Flori Mumajesi. Gjatë një bisede me konkurrentët e tjerë në spektaklin “Ferma VIP”, ajo u ndal te periudha e fejesës së tyre dhe vëmendja e jashtëzakonshme mediatike që, në fund, u kthye në shkatërruese për çiftin.

Malaj tregoi se gjatë viteve të lidhjes së tyre (2005–2009), kurioziteti i publikut dhe i mediave të shkruara ishte në nivele ekstreme, aq sa jeta e tyre private përfundonte çdo ditë në faqet e para të gazetave. Ky monitorim i vazhdueshëm krijoi një presion psikologjik mjaft të rëndë mbi të dy artistët.

"Ndarja e rreme" për t’i shpëtuar gazetave

Për të ilustruar situatën e vështirë, këngëtarja rrëfeu një prapaskenë të patreguar më parë, kur ata vendosën të inskenonin një ndarje të rreme, duke gënjyer madje edhe njerëzit e tyre më të afërt familjarë, vetëm për të larguar vëmendjen e opinionit publik:

"Bëmë ne një ndarje, gjoja, por edhe familjarëve u thamë ‘jemi ndarë’. Por duke dalë nga avioni dikush na bëri foto dhe lajmi u shpërnda menjëherë, doli në titrat e televizioneve informative. Shkuam në një restorant shumë të njohur dhe kur arritëm, të gjithë klientët ishin me sytë nga televizori duke parë lajmin tonë dhe u kthyen nga ne. U detyruam të uleshim diku në një cep", u shpreh ajo.

Mungesa e eksperiencës për të menaxhuar famën

Soni Malaj pranoi se në atë kohë, ndryshe nga sot ku artistët janë mësuar me portalet dhe rrjetet sociale, ekspozimi i vazhdueshëm në media ishte i papërballueshëm. Ajo konfirmoi se kur e kanë ridiskutuar këtë temë vite më vonë me Florin, të dy kanë rënë dakord se shkaku kryesor i ndarjes nuk ishin ndjenjat, por pamundësia për të menaxhuar atë presion të jashtëzakonshëm.

"Ne na është nxirë jeta. Shkaku kryesor pse jemi ndarë ka qenë ky presion. Kur e kemi ridiskutuar këtë gjë, se cila ishte arsyeja pse jemi ndarë, ishte pikërisht presioni shumë i madh. Nuk dinim ta menaxhonim", përfundoi rrëfimin e saj këngëtarja.