Autoritetet e Kosovës kanë ndërmarrë një tjetër hap për shtrirjen e kontrollit institucional në veri të vendit, duke marrë nën administrim objektet dhe pronat hekurudhore në komunat Zveçan dhe Leposaviq, të banuara me shumicë serbe.

Aksioni u zhvillua mëngjesin e së enjtes me asistencën e Policisë së Kosovës. Zëvendësdrejtori i Policisë për rajonin verior, Veton Elshani, konfirmoi se gjatë operacionit janë hequr tabelat me mbishkrimin “Hekurudhat e Serbisë” dhe janë zëvendësuar me tabela të reja të “Infrastrukturës Hekurudhore të Kosovës”, së bashku me flamurin shtetëror të Kosovës.

Ministri në detyrë i Punëve të Brendshme, Xhelal Sveçla, deklaroi se ligjet duhet të zbatohen në të gjithë territorin e Kosovës dhe se “Hekurudhat e Serbisë” përbëjnë një nga institucionet e fundit paralele që kanë funksionuar në veri.

Ndërkohë, ministri në detyrë i Infrastrukturës, Dimal Basha, bëri të ditur se të gjitha objektet dhe pronat publike hekurudhore në veri tashmë janë rikthyer nën menaxhimin e plotë të ndërmarrjes publike INFRAKOS.

Sipas tij, infrastruktura hekurudhore në veri ka qenë e uzurpuar prej vitesh nga strukturat ilegale serbe dhe ky veprim hap rrugën për rehabilitimin dhe modernizimin e rrjetit hekurudhor në përputhje me standardet shtetërore të Kosovës.

Basha theksoi gjithashtu rëndësinë strategjike të hekurudhës në veri, duke e cilësuar atë pjesë të rëndësishme të Korridorit X, që lidh Kosovën me rrjetet rajonale dhe ndërkombëtare të transportit.

Autoritetet kosovare kanë ndërmarrë gjatë dy viteve të fundit një sërë operacionesh për mbylljen e institucioneve serbe që funksiononin në zonat me shumicë serbe. Ndërsa Qeveria e Kosovës argumenton se po vendos rend dhe ligj, komuniteti serb dhe përfaqësuesit e tij i kanë cilësuar këto veprime si diskriminuese dhe represive.

Edhe bashkësia ndërkombëtare ka shprehur shqetësime për mënyrën e mbylljes së institucioneve serbe, duke kërkuar që komuniteteve joshumicë t’u garantohen fillimisht shërbimet bazë.

Sipas ndërmarrjes INFRAKOS, linjat hekurudhore drejt veriut të Kosovës nuk kanë qenë funksionale që nga viti 2008 për arsye sigurie dhe politike. Në raportin vjetor të kompanisë thuhet se strukturat paralele serbe kishin penguar prej vitesh qasjen e autoriteteve kosovare në segmentin verior të hekurudhës.