ATHINË – Ish-kryeministri grek Alexis Tsipras ka lançuar zyrtarisht një formacion të ri politik të majtë, të quajtur “Aleanca e Majtë Greke” (ELAS), të cilin e prezantoi si një nismë për një “Greqi të re”.

Në aktivitetin e mbajtur në qendër të Athinës, me Akropolin në sfond, Tsipras deklaroi se lëvizja e re synon të jetë “më shumë se një parti”, duke e përshkruar si një platformë të gjerë politike që kërkon të përfaqësojë shtresa të ndryshme të shoqërisë.

Ai kritikoi ashpër qeverinë konservatore të kryeministrit Kyriakos Mitsotakis, si dhe establishmentin tradicional të qendrës së majtë, duke i akuzuar për keqqeverisje, ndikim të interesave të fuqishme ekonomike dhe rënie të standardeve demokratike.

Tsipras tha se Greqia nuk mund të mbetet pasive përballë, siç u shpreh ai, përkeqësimit të kushteve sociale dhe ekonomike, duke përmendur çështje si pagat e ulëta, kriza e strehimit, kostoja e jetesës dhe pasiguria sociale.

Në deklaratat e tij, ai akuzoi gjithashtu partitë tradicionale për varësi nga sistemi financiar dhe për humbje të pavarësisë politike, duke përfshirë edhe Partinë Socialiste Panhelenike (PASOK).

Sipas dokumentit themelues të partisë së re, prioritetet kryesore përfshijnë rritjen e mirëqenies sociale, forcimin e mbikëqyrjes demokratike, zhvillimin ekonomik të drejtë, sigurinë klimatike dhe energjetike, si dhe një politikë të jashtme më aktive.

Tsipras bëri thirrje për një “revolucion moral” dhe një “patriotizëm të ri” të bazuar në drejtësi sociale dhe llogaridhënie institucionale.

Në aktivitet nuk morën pjesë përfaqësues të partisë SYRIZA dhe “Nea Aristera”, ndërsa në tubim ishin të pranishëm disa funksionarë të nivelit të mesëm dhe bashkëpunëtorë parlamentarë nga formacione të ndryshme të së majtës.