Krim i rëndë në Ulqin: Shqiptari nga Kosova dyshohet se vrau bashkëjetuesen dhe i vuri flakën banesës

Një ngjarje e rëndë kriminale është regjistruar në Ulqin, ku një 46-vjeçar nga Kosova dyshohet se ka vrarë bashkëjetuesen e tij dhe më pas i ka vënë zjarrin banesës ku jetonin.

Sipas mediave malazeze, shtetasi me inicialet B.G. 46 vjeç, është arrestuar nga autoritetet nën dyshimin për vrasjen e 36-vjeçares D.N., shtetase e Shqipërisë. Ngjarja ka ndodhur gjatë natës në lagjen Kodra.

Policia bëri të ditur se rreth orës 00:30 është njoftuar për një zjarr në një objekt banimi. Pas mbërritjes në vendngjarje, efektivët kanë gjetur trupin e pajetë të gruas, e cila fillimisht nuk ishte identifikuar.

Në vendin e ngjarjes është gjetur edhe i dyshuari me lëndime të shkaktuara nga zjarri. Ai është transportuar fillimisht në Spitali i Përgjithshëm i Tivarit dhe më pas në Qendra Klinike e Malit të Zi për trajtim mjekësor.

Hetimet po drejtohen nga Prokuroria e Lartë Shtetërore në Podgoricë, në bashkëpunim me policinë. Autoritetet kanë marrë dëshmi nga persona të ndryshëm, kanë siguruar pamje nga kamerat e sigurisë dhe prova materiale nga vendi i ngjarjes.

Sipas të dhënave paraprake të hetimit, ekziston dyshimi se 46-vjeçari ka kryer veprën penale të “vrasjes së rëndë”, më pas i ka vënë zjarrin banesës dhe është larguar nga vendi i ngjarjes.

Trupi i viktimës është dërguar për obduksion në Qendrën Klinike në Podgoricë, ndërsa i dyshuari vijon të mbahet nën mbikëqyrje policore gjatë trajtimit për djegiet e marra.