Ivanka Trump, vajza e Presidentit të SHBA-së, Donald Trump, ka ndarë me ndjekësit në rrjetet sociale momente nga fundjava luksoze në Bahamas, ku u celebrua dasma e vëllait të saj, Donald Trump Jr., me Bettina Anderson. Ish-këshilltarja e Shtëpisë Së Bardhë, tashmë 44 vjeçe, vodhi vëmendjen e mediave rozë me stilin e saj elegant dhe veshjet e përzgjedhura për eventet glamuroze pranë detit.

Përmes fotografive të publikuara në llogarinë e saj në Instagram, biznesmenja u shfaq me një sërë pamjesh verore, ku kombinonte sofistikimin dhe luksin. Në disa prej tyre, Ivanka shihet duke bërë paddleboarding në ujërat e kompleksit ishullor, e veshur me bikini të verdha, ndërsa në të tjera pozoi pranë bashkëshortit të saj, Jared Kushner. Ndër veshjet që spikatën më shumë ishte një fustan pa rripa ngjyrë limoni, me detaje lulesh dhe një dekolte të veçantë, të cilin e kishte kombinuar me sandale dhe aksesorë diskretë.

Ndonëse ndau imazhe nga atmosfera festive e fundjavës, Ivanka u tregua e kujdesshme për të mos publikuar foto të çiftit të sapomartuar, duke qenë se ceremonia u zhvillua në një rreth mjaft të ngushtë e privat. Në Bahamas ishin të pranishëm edhe anëtarët e tjerë të familjes, si Eric Trump dhe Tiffany Trump, të cilët gjithashtu dokumentuan takimet në plazh dhe festat private të mbrëmjes. Nga ana tjetër, ra në sy mungesa e Presidentit Donald Trump, i cili qëndroi në Uashington për shkak të detyrimeve shtetërore.