Si të mbani veten dhe shtëpinë të freskët gjatë motit të nxehtë

Kur temperaturat rriten ndjeshëm, ja gjashtë mënyra të thjeshta për të mbajtur trupin dhe shtëpinë më të freskët.

Futni ajër të freskët dhe krijoni qarkullim ajri

Hapni dritaret në anët e kundërta të shtëpisë për të krijuar qarkullim ajri. Kjo ndihmon në nxjerrjen e ajrit të nxehtë të bllokuar brenda dhe futjen e ajrit më të freskët nga jashtë.

Kjo funksionon më mirë kur temperatura jashtë është më e ulët se ajo brenda, zakonisht gjatë natës ose herët në mëngjes.

Në apartamentet që kanë dritare vetëm nga njëra anë, hapni edhe dyert dhe përdorni ventilator për të ndihmuar qarkullimin e ajrit.

Ajri i nxehtë ngjitet lart, ndaj nëse keni dalje ajrimi ose dritare në papafingo, hapini për të liruar nxehtësinë. Përndryshe, ajri i nxehtë mund të grumbullohet në katet e sipërme, duke e bërë të vështirë gjumin.

Izolimi i mirë ndihmon gjithashtu për të mbajtur nxehtësinë jashtë gjatë verës dhe për të ulur faturat e energjisë gjatë dimrit.

Mbani nxehtësinë jashtë gjatë ditës

Gjatë orëve më të nxehta të ditës, është më mirë të mbani dritaret të mbyllura, si dhe perdet apo grilat të ulura, sidomos në anën e shtëpisë ku bie dielli.

Kjo ndihmon që temperatura brenda të mos rritet më shumë.

Përdorni ventilator për më shumë freski

Ventilatorët janë një mënyrë më ekonomike dhe me konsum më të ulët energjie për të mbajtur ajrin në lëvizje.

Vendosja e ventilatorit përballë një dritareje të hapur mund të ndihmojë që ajri i freskët nga jashtë të shpërndahet në të gjithë dhomën, por vetëm nëse jashtë është më freskët.

Vendosja e akullit ose një ene me ujë të ftohtë përpara ventilatorit mund ta bëjë ajrin që fryn më të freskët. Mund të përdorni edhe më shumë se një ventilator për të krijuar qarkullim ajri.

Ekspertët thonë se ventilatori ndihmon më shumë kur freskon fytyrën për rehati, ndërsa freskimi i gjithë trupit ndihmon më shumë në uljen e temperaturës trupore.

Por në temperatura mbi 35°C, ventilatori mund të mos ndihmojë, pasi thjesht po fryn ajër të nxehtë drejt trupit.

Kufizoni aktivitetet që prodhojnë nxehtësi

Furra, sobat dhe pajisjet e gatimit lëshojnë shumë nxehtësi gjatë përdorimit dhe edhe pasi fiken.

Preferoni ushqime të ftohta si sallatat, sidomos në orët më të nxehta të ditës, për të shmangur krijimin e nxehtësisë së panevojshme.

Edhe lavatriçja, lavastovilja dhe pajisje të tjera prodhojnë nxehtësi, ndaj shmangni përdorimin e tyre në kulmin e vapës.

Freskoni trupin

Dushet me ujë të vakët ndihmojnë në uljen e temperaturës së trupit, por uji nuk duhet të jetë shumë i ftohtë.

Nëse uji është tepër i ftohtë, trupi mund të reagojë duke mbajtur nxehtësinë brenda, në vend që ta largojë.

Vendosja e një komprese me akull ose shisheje me ujë të ftohtë në trup mund të sjellë lehtësim të menjëhershëm. Është mirë ta mbështillni me një peshqir për të shmangur kontaktin direkt me lëkurën.

Veshjet ndikojnë shumë në temperaturën e trupit. Materialet natyrale si pambuku dhe liri ndihmojnë trupin të marrë frymë, ndërsa rrobat e lirshme lejojnë qarkullimin e ajrit.

Edhe çarçafët prej pambuku mund t’ju ndihmojnë të flini më mirë në netët e nxehta.

Këshilla shtesë:

Pini shumë ujë

Konsumoni ushqime me përmbajtje të lartë uji

Vishni rroba të lehta dhe kapele

Qëndroni në hije

Kufizoni lëvizjet dhe aktivitetin fizik në orët e nxehta

Përdorni ventilator, akull dhe dushe të freskëta

Kujdes me goditjen nga nxehtësia

Lodhja nga nxehtësia zakonisht nuk është serioze nëse trupi freskohet shpejt, por goditja nga nxehtësia është emergjencë mjekësore.

Shenja paralajmëruese:

marramendje

djersitje e tepërt

lëkurë e lagësht

të përziera

të vjella

ngërçe muskulore

Shenja të goditjes nga nxehtësia:

konfuzion

mungesë djersitjeje

temperaturë trupore mbi 40°C

lëkurë e nxehtë dhe e thatë

humbje ndjenjash

kriza

Gjeni ambiente alternative më të freskëta

Nëse shtëpia është shumë e nxehtë, mund të kërkoni strehim të përkohshëm në ambiente publike me ajër të kondicionuar, si biblioteka, qendra tregtare apo qendra sportive.

Në disa qytete europiane, autoritetet kanë krijuar edhe “hapësira freskuese” për qytetarët gjatë valëve të të nxehtit. /përkthyer nga BBC/