Një tentativë për futjen e lëndëve narkotike në Burgun e Dubravës, në Pejë, është parandaluar nga autoritetet penitenciare në Kosovë.

Sipas informacioneve paraprake, gjatë një vizite familjare, një grua ka tentuar të fusë në ambientet e burgut një sasi të dyshuar droge, të fshehur brenda një pelene për fëmijë.

Gjatë kontrollit rutinë, stafi i burgut ka konstatuar dy qese plastike me substancë të dyshuar narkotike, të vendosura në pelenë.

Menjëherë pas zbulimit të rastit, vizita është ndërprerë, ndërsa autoritetet penitenciare kanë njoftuar Policinë e Kosovës dhe njësitë hetimore në Pejë, të cilat kanë nisur veprimet për zbardhjen e plotë të ngjarjes.

Burime zyrtare bëjnë me dije se ndaj të burgosurit që dyshohet se lidhet me rastin janë marrë masa disiplinore, duke u transferuar në regjim më të rreptë deri në përfundim të hetimeve.

Ndërkohë, autoritetet po punojnë për identifikimin e plotë të lëndës së sekuestruar dhe dokumentimin e përgjegjësive ligjore të personave të përfshirë.