Francesco Diviesti u vra një vit më parë dhe trupi i tij u dogj në një zonë të izoluar të Alta Murgia-s në Itali. Sot, u ekzekutuan 15 masa paraprake personale, të lëshuara nga gjyqtari hetues i Barit dhe gjyqtari i Gjykatës së Shkallës së Parë të Posaçme të Tiranës për Antikorrupsionin dhe Krimin e Organizuar, si pjesë e hetimeve të koordinuara nga Drejtoria Antimafia e Rrethit të Barit dhe Zyra e Prokurorit të Posaçëm të Shqipërisë për Antikorrupsionin dhe Krimin e Organizuar.

Viktima u dogj mes gomave pas konfliktit dhe të shtënave

Sipas hetimeve, Diviesti u vra nga dy persona dhe ngjarja dyshohet të ketë nisur pas një tentative zhvatjeje për një borxh prej 500 eurosh, i cili më pas ishte ulur në 300 euro, lidhur me marrjen me qira të një automjeti në favor të të dyshuarit kryesor, 41-vjeçarit Igli Kamberi.

“Diviesti kundërshtoi kilometrat e automjetit të marrë me qira dhe ky qëndrim u interpretua si një fyerje, sepse 26-vjeçari vuri në diskutim rolin dominues të 41-vjeçarit, fjalën e tij. Një fyerje që, sipas gjuhës më primitive të pushtetit mafioz, duhej larë me gjak”, shpjegoi zëvendësprokurori Giuseppe Gatti, koordinator i Drejtorisë Antimafia të Barit.

“Frika mbetet arma më efektive për të ushtruar presion dhe këtë e konfirmon edhe deklarata e një miku të 26-vjeçarit, i cili pasi tregoi për tentativën e zhvatjes dhe pas gjetjes së trupit, u kthye tek hetuesit për të tërhequr deklaratën, sepse kishte përmendur emra personash që, sipas tij, ishin të rrezikshëm”, tha më tej Chimienti.

Asgjësimi i trupit të 26-vjeçarit ishte “një mesazh për të gjithë: kush gabon, paguan. Me gjak”, theksoi prokurori Roberto Rossi.