Një ngjarje në Itali çoi te zbulimi i një rrjeti të fuqishëm që vepronte mes Shqipërisë dhe Italisë, ndërsa një operacion i gjerë i përbashkët mes SPAK dhe Drejtorisë Antimafia të Barit ka goditur grupin e dyshuar për trafik ndërkombëtar droge dhe pastrim parash.

Hetimet nisën pas ngjarjes së rëndë me shtetasin italian Francesco Diviesti, 26 vjeç, e ndodhur më 25 prill 2025 në jug të Italisë. Sipas autoriteteve italiane, i riu fillimisht u përfshi në një konflikt në një lokal dhe më pas u dërgua në një zonë të izoluar në Canosa di Puglia, ku humbi jetën. Trupi i tij u gjet katër ditë më vonë, ndërsa kjo çështje çoi hetuesit drejt zbulimit të një organizate kriminale të strukturuar.

Sipas hetimeve, në këtë çështje është përfshirë edhe shtetasi shqiptar Igli Kamberi, i konsideruar nga autoritetet si drejtues i grupit kriminal. Ai u arrestua në korrik 2025, ndërsa një tjetër shqiptar i dyshuar u arrestua në Hungari me 24 kilogramë kokainë të pastër.

Hetimet zbuluan një rrjet të gjerë që dyshohet se merrej me trafik ndërkombëtar droge dhe pastrim parash nga Italia drejt Shqipërisë.

Një nga episodet kyçe të hetimit lidhet me sekuestrimin e mbi 680 mijë eurove cash në pikën kufitare të Muriqanit në nëntor 2024, shumë që dyshohet se i përkiste grupit dhe po tentohej të futej në Shqipëri.

Në operacionin e zhvilluar këtë të martë u arrestua edhe Ergys Kastrati, i shpallur prej dy vitesh në kërkim ndërkombëtar nga autoritetet italiane. Bashkë me të u arrestuan edhe bashkëshortja e tij, Desmira Ceco, si dhe dy persona të tjerë të dyshuar për transportim të parave.

Gjykata e Posaçme ka vendosur gjithashtu sekuestron preventive për katër kompani, tetë automjete, dhjetë llogari bankare dhe shumën prej 680.595 euro cash.

Sipas SPAK, operacioni është pjesë e një hetimi shumëvjeçar kundër trafikut ndërkombëtar të kokainës dhe heroinës, ku nga viti 2018 deri në 2025 janë ekzekutuar 170 masa sigurie, janë sekuestruar pasuri me vlerë miliona euro dhe janë kapur mbi 7 ton drogë.

E PLOTË/ SPAK dhe Drejtoria Distriktuale Antimafia e Barit zhvillojnë një operacion të gjerë në kuadër të hetimeve për një grup të strukturuar kriminal, trafik ndërkombëtar droge dhe pastrim parash

Struktura e Posaçme kundër Korrupsionit dhe Krimit të Organizuar (SPAK) dhe Drejtoria Distriktuale Antimafia e Barit (DDA) zhvilluan mëngjesin e sotëm një operacion të përbashkët dhe të gjerë në kuadër të hetimeve ndërkombëtare në Shqipëri dhe Itali, i realizuar nga Skuadra e Përbashkët hetimore, e ngritur më mbështetjen e Eurojust.

Hetimet u përqëndruan në zbulimin e vrasjes së Francesco Diviesti-t, ngjarje e ndodhur më 25 Prill të vitit 2025, në Canosa di Puglia, në jug të Italisë dhe të një organizate kriminale shqiptare, me bazë në Tiranë, të përfshirë në trafikun ndërkombëtar të drogës dhe pastrimin e produkteve të veprës penale, nga Italia në Shqipëri.

Gjykata e Posaçme kundër Korrupsionit dhe Krimit të Organizuar ka lëshuar 10 masa sigurimi personal, ndërsa 5 të tjera janë lëshuar nga autoritetet gjyqësore italiane. Këto masa janë vendosur ndaj 11 shtetasve shqiptarë, 4 italianë, (përfshirë 4 gra, të vendosura nën masën e arrestit në shtëpi dhe detyrim paraqitje). Masat u ekzekutuan në bazë të një urdhër arresti ndërkombëtar në Tiranë, Fier, Vlorë (Shqipëri), në Barletta, në burgun e Romës dhe Agnani, (Itali) si dhe në Madrid (Spanjë).

Veprat penale:

Vrasje me paramendim, e kryer duke përdorur metoda mafioze të ekzekutimit

Tentativë zhvatjeje;

Posedim dhe mbajtje e paligjshme e armëve të zjarrit dhe municioneve;

Favorizim personal;

Shkelje të masave parandaluese personale;

Pastrim ndërkombëtar i produkteve të veprës penale nga Italia në Shqipëri

Në masën paraprake të lëshuar nga Gjykata e Barit është konfirmuar qëndrueshmëria e provave ndaj tre personave, të hetuar si ekzekutorë material krimit të kryer ndaj Francesco Diviestit; një shqiptar (autori) dhe dy italianë nga Barleta, një burrë dhe një grua, që ndihmuan në fshehjen e gjurmëve të krimit duke mos e raportuar atë tek autoritetet gjyqësore.

Ekzekutimi i Francesco Diviesti-t – 25 Prill 2025

Hetimet zbuluan se në mbrëmjen e datës 25 Prill 2025, Francesco Diviesti u përfshi në një konflikt, në një bar të Barletta-s dhe u dërgua brenda disa shpellave, pranë një zonë të izoluar në Murgia-n e sipërme, në Casosa di Puglia, ku është qëlluar 5 herë nga dy pistoleta dhe më pas, i është vënë flaka brenda disa gomave, me qëllim që kufoma të digjej, sipas një metode të përdorur në vitet ’90, në këtë zonë. Duke iu referuar kësaj mënyre të ekzekutimi, hetimi u mor përsipër nga Drejtoria Antimafia e Barit, duke lokalizuar kufomën brenda katër ditëve. Më 25 Qershor, shtetasi shqiptar i përfshirë në krim, i cili ishte larguar dy ditë pas ekzekutimit të Diviesti-t, u arrestua në qytetin Roshe të Hungarisë, jo për vrasje, por për posedim të 24 kilogramëve kokainë të pastër, në kuadër të procedimit të Prokurorisë së Tranit. Drejtoria Antimafia e Barit i kishte dërguar provat kësaj Prokurorie për të bërë të mundur arrestimin e tij për këtë krim. Në të njëjtën kohë, tek familjarë të tij u sekuestruan mbi 412.000 euro ‘cash’ si dhe u dokumentua përfshirja e tre shtetasve italianë në këtë çështje penale në hetim.

Rindërtimi i vrasjes së Diviesti-t dhe identifikimi i grupit kriminal të përfshirë në pastrimin e produkteve të veprës penale u bë i mundur falë një hetimi më të gjerë ndaj shtetasve shqiptarë të vendosur në Puglia, të zhvilluar nga Drejtoria Hetimore Antimafia e Barit, nën drejtimin dhe koordinimin e Drejtorisë Antimafia të Barit, në kuadër të trafiqeve ndërkombëtare të drogës nga Shqipëria në Puglia.

Lidhur më shtetasit e hetuar, GJKKO ka caktuar gjithashtu edhe sekuestron preventive për 4 shoqëri tregtare, 8 automjete, 10 llogari bankare dhe shumën prej 680.595 euro, të cilat u sekuestruan nga Policia e Shtetit në 14 Nëntor 2024 në Pikën e Kalimit Kufitar të Muriqanit, pas informacionit të marrë nga Qëndra Operative DIA, Bari.

Operacioni i sotëm është pjesë e një projekti hetimor shumëvjeçar mes SPAK dhe DDA-së të Barit kundër trafikut ndërkombëtar të kokainës dhe heroinës, të menaxhuara nga organizata kriminale shqiptare dhe pason operacionet:

Shefi

Kulmi

Shpirti

Ura

Nga viti 2018 deri në 2025, këto operacione kanë çuar në vendosjen e 170 masave të sigurisë, sekuestrimin e pasurive në vlerën e miliona eurove dhe kapjen e mbi 7 tonëve drogë (kokainë, heroinë, kanabis). Në shkallë të ndryshme të gjykimit janë vendosur dënime deri në 20 vjet heqje lirie për secilin të pandehur.