Rreth 2 milionë besimtarë myslimanë nga e gjithë bota u mblodhën në malin Mali Arafat, në Arabia Saudite, për të shënuar Ditën e Arafatit, një nga momentet më të shenjta të besimit islam që paraprin festën e Kurban Bajrami.

Pavarësisht temperaturave ekstreme që kaluan 45 gradë Celsius dhe tensioneve të vazhdueshme në Lindjen e Mesme, miliona pelegrinë iu bashkuan ritualeve të Haxhit, një nga pesë shtyllat themelore të Islamit.

Në vendin ku besohet se Profeti Muhamed mbajti predikimin e tij të fundit, besimtarët u lutën për falje, paqe dhe mirësi për familjet e tyre dhe mbarë botën.

Pelegrinët do të vijojnë ritualet fetare me ceremoninë simbolike të goditjes me gurë të djallit, e cila shënon edhe nisjen e festës së Kurban Bajrami, festa e sakrificës për myslimanët në të gjithë botën.

Autoritetet saudite kanë marrë masa të shtuara sigurie dhe mbrojtjeje shëndetësore për të shmangur përsëritjen e tragjedive të viteve të kaluara, kur mbi 1300 persona humbën jetën për shkak të temperaturave të larta gjatë Haxhit.

Për menaxhimin e këtij tubimi masiv janë angazhuar më shumë se 250 mijë punonjës, përfshirë personel sigurie, ekipe mjekësore dhe shërbime emergjence.

Haxhi konsiderohet një detyrim fetar që çdo mysliman duhet ta kryejë të paktën një herë në jetë, nëse ka mundësi fizike dhe ekonomike, dhe mbetet një nga grumbullimet më të mëdha njerëzore në botë.