TIRANË – Ministria e Mbrojtjes së Greqisë ka reaguar zyrtarisht pas vizitës së ministrit Nikos Dendias në Tiranë, ku ai zhvilloi takime me kryeministrin Edi Rama, ministrin e Mbrojtjes Ermal Nufi dhe Kryepeshkopin e Kishës Ortodokse Shqiptare Joan Pelushi.

Në njoftimin zyrtar, pala greke thekson se bisedimet janë fokusuar në forcimin e marrëdhënieve dypalëshe në fushën e mbrojtjes, bashkëpunimin brenda NATO-s dhe zhvillimet rajonale e ndërkombëtare.

Ministria greke bën të ditur gjithashtu se është rënë dakord që ministri shqiptar i Mbrojtjes të zhvillojë një vizitë në Athinë në fund të muajit të ardhshëm, në kuadër të thellimit të bashkëpunimit mes dy vendeve.

Një nga pikat e diskutuara ka qenë edhe siguria kibernetike, ku sipas palës greke, Shqipëria mund të ndajë përvojën e saj lidhur me sulmet kibernetike të regjistruara në muajt e fundit, si pjesë e shkëmbimit të ekspertizës mes dy vendeve.

Gjatë vizitës në Tiranë, Dendias u prit fillimisht në Ministrinë e Mbrojtjes, ku u zhvilluan takime dypalëshe dhe më pas të zgjeruara me delegacionet përkatëse. Më pas, ai u takua edhe me kryeministrin Rama, ku u diskutua situata gjeopolitike në rajon.

Ministri grek vizitoi gjithashtu Katedralen “Ngjallja e Krishtit” në Tiranë, ku u prit nga Kryepeshkopi Joan Pelushi, si dhe u ndal në kriptën ku prehet Kryepeshkopi i ndjerë Anastas.

Në deklaratën e tij pas vizitës, Dendias vlerësoi rëndësinë e bashkëpunimit me Shqipërinë në kuadër të NATO-s dhe procesit të integrimit europian, duke theksuar nevojën për një qasje të përbashkët ndaj sfidave të sigurisë në rajon.

I had the pleasure of discussing with my Albanian counterpart, Ermal Nufi, the deepening of our defence relations and inviting him to visit Athens.We had the opportunity to agree on a common interpretation of the geopolitical challenges facing our wider region and to examine… pic.twitter.com/7QUsqzoCiz

— Nikos Dendias (@NikosDendias) May 25, 2026