Sopranoja shqiptare me famë ndërkombëtare Ermonela Jaho është vlerësuar nga shteti francez me titullin “Chevalier des Arts et des Lettres” (Kalorës i Arteve dhe Letrave), një nga dekoratat më të larta që jepen për kontribut të jashtëzakonshëm në fushën e artit dhe kulturës.

Ky vlerësim i akordohet personaliteteve që kanë dhënë ndikim të rëndësishëm në promovimin e arteve dhe trashëgimisë kulturore në nivel ndërkombëtar.

Pas marrjes së titullit, Jaho ka reaguar me një mesazh mirënjohjeje, duke e cilësuar këtë moment si një emocion të veçantë dhe një nder të madh personal, duke theksuar lidhjen e saj të fortë me kulturën dhe artin francez.

Ajo u shpreh gjithashtu mirënjohëse ndaj bashkëpunëtorëve dhe mbështetësve të saj ndër vite, duke veçuar figurat që e kanë shoqëruar në karrierën e saj artistike.

Sopranoja shqiptare vijon të mbetet një nga emrat më të vlerësuar të skenës operistike botërore, me një karrierë të shtrirë në teatrot më prestigjioze ndërkombëtare.