Plagosja e djalit të mitur në Tiranë, shoku e qëlloi pa dashje duke i treguar pistoletën që kishte

Djali i mitur që u plagos natën duke gdhirë dita e sotme në Tiranë është në gjendje serioze në spital, nën kujdesin e mjekëve.

Ngjarja që çoi në plagosjen e tij është zbardhur dhe rrethanat e saj janë dramatike.

Noa.al mëson se sot në orën 01.40 të mëngjesit, policia u njoftua se në rrugën “Berit Beker” ishte plagosur me armë zjarri një 17-vjeçar.

Shërbimet e Sektorit për Hetimin e Krimeve të Rënda kanë shkuar në vendngjarje, me qëllim sqarimin e rrethanave dhe dokumentimin e plotë ligjor të rastit.

Nga veprimet e para hetimore rezulton se në banesën e shtetasit R. S., 19 vjeç, ky i fundit, i ka treguar armën e zjarrit pistoletë shokut të tij.

Duke i treguar pistoletën shokut, Rigelërs Sylaj ka menduar se nuk kishte fishek në fole.

Në një momen, Rigersi e ka shkrepur aksidentalisht dhe për pasojë është plagosur 17-vjeçari, shoku i tij.

Në përfundim të veprimeve të para hetimore, policia tha se u bë arrestimi në flagrancë i shtetasit Rigers Sylaj, 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”.

Sakaq u arrestuan shtetasit A. V., 20 vjeç dhe H. H., 22 vjeç, për veprën penale “Veprime që pengojnë zbulimin e së vërtetës”.

17-vjeçari ndodhet në spital, nën kujdesin e mjekëve.

Vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes.

Materialet procedurale i kaluan Prokurorisë, për veprime të mëtejshme.