ANGOLË – Të paktën 28 persona kanë humbur jetën pasi një minierë ilegale ari u shemb si pasojë e një rrëshqitjeje të madhe dheu në Bengo Province, rreth 60 kilometra larg kryeqytetit Luanda.

Ngjarja tragjike ndodhi në fshatin Kanakasala, ku viktimat po kërkonin ar në momentin kur masa e dheut u shemb mbi ta, duke i zënë poshtë rrënojave.

Sipas policisë lokale, viktimat janë kryesisht burra të moshës nga 18 deri në 40 vjeç. Autoritetet raportojnë se mes viktimave ndodheshin edhe 13 anëtarë të së njëjtës familje.

Ekipet e emergjencës dhe shpëtimit vijojnë operacionet në zonë në kërkim të të mbijetuarve dhe trupave të tjerë që mund të ndodhen ende nën dhe. Ndërkohë, autoritetet angoleze kanë nisur hetimet për të zbardhur shkaqet e aksidentit dhe aktivitetin ilegal në minierë.

Ngjarje të tilla janë të shpeshta në zonat minerare ilegale të Angolës, ku mungesa e masave të sigurisë dhe kushtet e rrezikshme të punës shkaktojnë shpesh viktima.