Homazhet në nder të aktorit të njohur shqiptar Birçe Hasko do të zhvillohen sot, në orën 10:00, në Teatri Kombëtar i Operas dhe Baletit, një ditë pas ndarjes së tij nga jeta në moshën 84-vjeçare.

Një prej figurave më të dashura dhe më të vlerësuara të skenës dhe ekranit shqiptar, Birçe Hasko la pas një trashëgimi të pasur artistike, duke u shquar veçanërisht për interpretimin brilant të roleve dytësore, të cilave u jepte jetë, karakter dhe origjinalitet të veçantë.

Ndër rolet më të spikatura të karrierës së tij mbetet ai i Milo Tafanit në filmin Shi në Plazh, interpretim që konsiderohet si një nga realizimet më të arrira të aktorit. Përveç angazhimeve në teatër, ai interpretoi dhjetëra role në kinematografi, duke sjellë me mjeshtëri karakterin popullor të jugut dhe duke u bërë një figurë e paharrueshme për publikun shqiptar.

I lindur më 15 mars 1942, në Dukat të Vlorës, Birçe Hasko u dallua për stilin e tij unik interpretues, ku elementët komikë dhe personazhet fshatarake shndërroheshin në identitet artistik. Fizionomia e tij shprehëse, spontaniteti në lojë dhe mënyra karakteristike e të folurit e bënin interpretimin e tij lehtësisht të dallueshëm dhe të pazëvendësueshëm.

Rruga e tij drejt artit nisi fillimisht në arsim. Në vitin 1961 ai përfundoi shkollën e mesme pedagogjike “Jani Minga”, duke ushtruar profesionin e mësuesit përpara se t’i përkushtohej aktrimit.

Në vitin 1965 ai nisi studimet në Instituti i Lartë i Arteve, ku u diplomua për aktrim në vitin 1969. Pas përfundimit të studimeve, ai iu bashkua jetës akademike si pedagog i mjeshtërisë së aktorit në Akademinë e Arteve, ndërsa në periudhën 1989–1994 mbajti edhe postin e dekanit të Fakultetit të Artit Skenik.

Kontributi i tij në artin shqiptar u vlerësua ndër vite me tituj të rëndësishëm. Më 13 nëntor 1989 ai u nderua me titullin “Artist i Merituar”, në vitin 1995 mori titullin akademik “Profesor”, ndërsa më vonë edhe titullin e lartë “Mjeshtër i Madh”.