Një rast i pazakontë është zbuluar në Shkup, ku një 25-vjeçare dyshohet se ka tentuar të fusë lëndë narkotike në burgun e Idrizovës. Ajo kishte shkuar për vizitë tek bashkëshorti i saj i burgosur me 60 vezë, prej të cilave 28 rezultuan se përmbanin kokainë dhe marihuanë.

Pas kontrollit rutinë, brenda vezëve u gjetën qese të vogla me mbi 318 gramë marihuanë dhe rreth 142 gramë kokainë. Prokuroria nisi hetimet ndaj 25-vjeçares për prodhim dhe shpërndarje të paligjshme të lëndëve narkotike, duke kërkuar masën e arrestit shtëpiak për rrezikun e arratisjes dhe përsëritjes së veprës.

Në shqyrtimin e masës u mor parasysh fakti që ajo është nënë e disa fëmijëve të mitur, përfshirë një foshnje pesë muajshe. Hetuesit dyshojnë se droga kishte si destinacion ambientet e brendshme të burgut.