Ministri i Infrastrukturës dhe Energjisë, Enea Karakaçi, deklaroi sot se mbikalimi aktual i Rinasit në autostradën Tiranë-Durrës do të shembet për t’i lënë vendin një objekti të ri me katër korsi, me qëllim lehtësimin e trafikut të rënduar në këtë aks. Gjatë një konference për shtyp, ministri sqaroi gjithashtu se rruga në ndërtim do të jetë plotësisht pa pagesë për qytetarët.

Karakaçi bëri me dije se punimet në autostradë po vijojnë dhe se kontrata aktuale në zbatim përfshin zgjerimin e korsive shtesë dhe ndërhyrjen radikale në mbikalim. Sipas tij, hapja e gjashtë kilometrave të para në drejtim të Rinasit dhe Tiranës ka ndryshuar rrjedhën e qarkullimit, por nyja e mbikalimit mbetet pika kryesore ku krijohet ngarkesë.

Lidhur me shqetësimet për një bllokim të përkohshëm në rrugën që të çon drejt Rinasit, ministri specifikoi se bëhej fjalë për një problematikë të krijuar nga nevoja e ngushtimit të rrugës, e cila tashmë është zgjidhur pas ndërhyrjes së Autoritetit Rrugor Shqiptar (ARRSH).

I pyetur nga gazetarët mbi mundësinë e vendosjes së një tarife kalimi për këtë aks, Karakaçi preku parimin e financimit publik, duke konfirmuar se për sa kohë që të gjitha investimet e këtij projekti mbulohen nga buxheti i shtetit, rruga do të mbetet pa pagesë për të gjithë përdoruesit e saj.