ROMË – "Calendario Romano", një nga suveniret më të njohura dhe më të diskutueshme për turistët në Romë, i cili prej vitesh shitet pranë Vatikanit, është përfshirë nga një debat i madh. Një nga imazhet më ikonike të këtij kalendari, i njohur gjerësisht për portretet e “priftërinjve seksi”, ka pranuar publikisht se shumica e modeleve që shfaqen në të nuk kanë asnjë lidhje me klerin.

Giovanni Galizia, i cili ka qenë një nga fytyrat më të identifikuara të këtij kalendari për më shumë se dy dekada, rrëfeu në një intervistë për agjencinë e lajmeve "Associated Press" se gjithçka ishte thjesht një set fotografik artistik. Ai tregoi se kur u fotografua ishte vetëm 17 vjeç dhe e konsideronte atë si një punë të thjeshtë modelingu. "Shokët e mi qeshnin me të madhe kur më panë të veshur si prift", u shpreh Galizia.

Debati mbi vërtetësinë e personazheve nisi pas një shkrimi të gazetës italiane "La Repubblica", e cila e cilësoi projektin si “kalendari i priftërinjve të rremë”. I detyruar të sqarojë situatën, fotografi dhe autori i këtij projekti, Piero Pazzi, pranoi se vetëm një e treta e personave që shfaqen në edicionin e vitit 2027 janë realisht pjesë e klerit, ndërsa pjesa tjetër janë modele.

Pazzi u mbrojt duke thënë se qëllimi nuk ka qenë kurrë mashtrimi i blerësve, por realizimi i një projekti artistik bardh e zi, të frymëzuar nga estetika klasike romake. Të njëjtin mendim ndan edhe vetë Galizia, i cili e konsideron produktin thjesht art. "Nëse dikush mendon se dukem seksi me jakën e priftit, unë e marr si kompliment", shtoi ai me humor.

I shitur në qendrën historike të Romës për rreth 8 euro, ky kalendar mbetet një nga suveniret më të kërkuara nga vizitorët e huaj. Pavarësisht zhurmës mediatike dhe zbulimit se bëhet fjalë kryesisht për modele, Vatikani ka zgjedhur të mbajë një qëndrim neutral, duke mos bërë asnjë koment zyrtar për ngjarjen.