Shkup – Protesta e studentëve shqiptarë në Maqedoninë e Veriut, e zhvilluar disa ditë më parë në kryeqytet, ka krijuar jehonë të madhe kombëtare dhe mediatike. Sheshet dhe rrugët kryesore të Shkupit u mbushën me flamuj kuqezi, ndërsa studentë shqiptarë nga Kosova dhe Shqipëria u nisën drejt kryeqytetit për t’iu bashkuar tubimit.

Megjithatë, tensionet ndëretnike janë rikthyer, pasi në rrjetet sociale po qarkullojnë fotografi me përmbajtje urrejtjeje ndaj shqiptarëve. Një prej tyre përmban mesazhin: “As në tokë, as në qiell, vend për shqiptarë nuk ka”. Fotografia u publikua fillimisht nga qendra sportive “Forca” në Shkup dhe më pas u shpërnda nga figura politike dhe aktivistë, të cilët kanë kërkuar një reagim të menjëhershëm nga institucionet shtetërore. Deri tani, nuk ka pasur asnjë reagim zyrtar.

Studentët shqiptarë protestuan për mundësimin e mbajtjes së provimit të jurisprudencës në gjuhën shqipe, përveç gjuhës maqedonase. Me pankarta, ata u nisën nga Ura e Gurit drejt Ministrisë së Drejtësisë, duke kërkuar zbatimin e Ligjit të Gjuhëve dhe që zëri i tyre të dëgjohet. Gjatë protestës, ata u ndaluan nga policia, dhe tre persona u arrestuan.