Ministri i Punëve të Brendshme, Besfort Lamallari, ka prezantuar masat e ndërmarra për garantimin e sigurisë gjatë sezonit turistik veror, duke theksuar rritjen e fluksit të turistëve në vend.

Gjatë një konference për mediat, Lamallari deklaroi se strukturat e Policia e Shtetit dhe institucionet e tjera ligjzbatuese kanë marrë masa të posaçme jo vetëm për sigurinë në territor, por edhe për krijimin e një imazhi pozitiv që në pikat e kalimit kufitar.

Sipas tij, gjatë periudhës 1 korrik–31 gusht 2026 do të ketë patrullime të dedikuara 12-orëshe në zonat turistike, me qëllim rritjen e pranisë policore dhe parandalimin e incidenteve.

Ministri bëri të ditur gjithashtu se janë ngritur stacione provizore policore pranë zonave me fluks të lartë turistik, përfshirë Valbonën, Thethin, Komanin, Tales, Gjirin e Lalëzit dhe Ksamilin.

Ai u ndal edhe te masat për menaxhimin e trafikut dhe lehtësimin e procedurave në pikat e kalimit kufitar, duke theksuar shtimin e sporteleve për përpunimin e pasagjerëve në porte dhe aeroporte.

Lamallari tha se Shqipëria po avancon në përdorimin e teknologjive të reja në kontrollin kufitar, përmes sistemit e-Gate në aeroportin e Rinasit, ndërsa theksoi se një sistem i ngjashëm pritet të aplikohet edhe në portet e Durrësit dhe Sarandës për të përshpejtuar procedurat e hyrjes dhe daljes së qytetarëve dhe turistëve.