SHBA – Elon Musk ka humbur betejën gjyqësore ndaj Sam Altman lidhur me drejtimin dhe transformimin e kompanisë OpenAI, pasi juria rrëzoi padinë e ngritur nga miliarderi amerikan.

Sipas vendimit, veprimi ligjor i Musk është konsideruar i depozituar jashtë afateve ligjore, ndërsa akuzat e ngritura prej tij janë vlerësuar si të parashkruara.

Musk kishte pretenduar se Sam Altman kishte devijuar nga misioni fillestar i OpenAI, i cili sipas tij ishte krijuar për të zhvilluar inteligjencën artificiale në shërbim të njerëzimit dhe jo për qëllime fitimi.

Nga ana tjetër, Altman ka argumentuar se Musk ishte larguar nga projekti pasi nuk kishte arritur të siguronte kontrollin e kompanisë.

Pas një procesi gjyqësor që zgjati 11 ditë, juria prej nëntë anëtarësh shpalli në favor të OpenAI dhe drejtuesve të saj, vendim i cili u konfirmua edhe nga gjyqtarja federale Yvonne Gonzalez Rogers, duke lënë në fuqi strukturën aktuale të kompanisë.

Padia ishte ngritur në vitin 2024, ndërsa Musk, një nga bashkëthemeluesit e OpenAI në 2015, ishte larguar nga bordi drejtues në vitin 2018. Në çështje ishte përfshirë edhe Microsoft, të cilin Musk e akuzonte për mbështetje në transformimin e OpenAI drejt modelit fitimprurës.

Ekipi ligjor i Musk kishte kërkuar, ndër të tjera, kthimin e deri në 134 miliardë dollarë fitime të pretenduara si të paligjshme, si dhe ndryshime në drejtimin e kompanisë, përfshirë largimin e Sam Altman dhe Greg Brockman.

Nga ana e tyre, përfaqësuesit e OpenAI argumentuan se investimet dhe ristrukturimi ishin të domosdoshëm për të përballuar konkurrencën në tregun global të inteligjencës artificiale, përfshirë edhe rivalë si Google DeepMind.