13-vjeçari Akram al-Fayoumi nga Gaza humbi krahun e majtë dhe këmbën e djathtë gjatë një sulmi izraelit, por po përpiqet të vazhdojë jetën falë pasionit të tij për rollerat dhe kalërimin.

Në Gaza, dhjetëra mijëra njerëz kanë humbur jetën gjatë sulmeve të ushtrisë izraelite që nga tetori i vitit 2023. Sipas Kombeve të Bashkuara, mbi 6.600 persona që kanë pësuar humbje të gjymtyrëve kanë nevojë për mbështetje protetike dhe rehabilitim.

Akram përshkroi momentin e sulmit që i ndryshoi jetën: “U plagosa në shkollën Abdulfattah Hammoude. Po shkoja të merrja rollerat për të luajtur me miqtë e mi, kur papritmas një raketë goditi dhe përfundova në Spitalin Baptist Al-Ahli”, rrëfen ai.

I ndihmuar nga kushëriri i tij për t’u dërguar në spital, Akram kujton: “Vazhdova të recitoja Shehadetin gjatë rrugës. Kur u zgjova, kuptova se kisha humbur dorën dhe këmbën”.

13-vjeçari u shpreh me dhimbje për pasojat e sulmit: “Cili është krimi ynë, mëkati ynë në këtë luftë? Pse iu nënshtruam kësaj? Pse u plagosa kështu dhe më prenë dorën dhe këmbën? Ndjeva sikur nuk kisha më asgjë”.

Akram është një nga mijëra fëmijët me aftësi të kufizuara në Gaza, të cilët përballen me pasojat e dhunës së vazhdueshme dhe nevojën për mbështetje humanitare dhe rehabilituese.