Nga kongresi i partisë Demokracia e Re, i mbajtur të dielën në Athinë, kryeministri grek Kyriakos Mitsotakis dha sinjalin më të qartë deri tani për synimin e një mandati të tretë qeverisës, duke premtuar vijimin e reformave, rritjen ekonomike dhe stabilitetin politik në Greqi.

Në fjalën përmbyllëse të kongresit tre-ditor, Mitsotakis deklaroi se Greqia është më e fortë kur Demokracia e Re është e bashkuar. “Jemi më të bashkuar se kurrë. Kur Demokracia e Re fiton, fiton edhe atdheu”, tha ai, duke e paraqitur fitoren në zgjedhjet e ardhshme si një nevojë për stabilitetin e vendit dhe jo vetëm si objektiv partiak.

Kryeministri paralajmëroi kundër rikthimit të “paqëndrueshmërisë dhe eksperimentimeve” të mëparshme, duke nënvizuar se një ekonomi e fortë është kushti kryesor për një Greqi të fortë. Ai theksoi rëndësinë e përdorimit të inteligjencës artificiale për përmirësimin e administratës publike dhe funksionimin e shtetit.

Duke bërë bilancin e qeverisjes që prej vitit 2019, Mitsotakis theksoi rritjen e punësimit si një arritje kryesore: “Në vitin 2019 papunësia ishte 18%. Sot kemi krijuar 600 mijë vende pune”, tha ai, duke shtuar se kjo ka nxitur kthimin e të rinjve që kishin emigruar.

Ai foli gjithashtu për përgjegjësinë fiskale, duke theksuar se masat sociale duhet të mbeten brenda kufijve të buxhetit dhe duke mbrojtur uljet e taksave të administratës së tij. Kryeministri përmendi rritjen e investimeve të huaja, pagës minimale dhe mesatare, si dhe pensioneve, si tregues të progresit ekonomik.

Për zgjedhjet e ardhshme, Mitsotakis deklaroi se ato do të mbahen në vitin 2027 dhe kërkoi një fitore të tretë historike për Demokracinë e Re. Ai prezantoi një plan të bazuar në tre prioritete: mirëqenie për të gjithë, siguri kombëtare dhe rinovim institucional përmes reformave strukturore, duke përfshirë edhe ndryshime të mundshme kushtetuese.

“Të ecim së bashku për Greqinë e vitit 2030”, përfundoi Mitsotakis, duke ftuar qytetarët dhe partinë të bashkohen pas vizionit të tij për të ardhmen e vendit.