Sara Hoxha ka qenë së fundmi e ftuar në një intervistë për X Media, ku ka folur hapur për jetën e saj personale dhe raportin me vajzën e saj, Poem.

Gjatë bisedës, ajo u pyet se cila ishte pyetja më e vështirë që e vogla i kishte bërë deri më tani, duke ndarë një moment mjaft delikat dhe emocional për të si nënë.

Sara tregoi se pyetja më e vështirë e vajzës kishte lidhje me ndarjen e saj nga reperi Ledri Vula. “Një pyetje shumë e vështirë që Poem më bëri para pak kohësh është se pse jam ndarë unë dhe Ledri,” rrëfeu ajo gjatë intervistës.

Ajo shpjegoi se i kishte dhënë një përgjigje të sinqertë, duke përdorur një gjuhë të thjeshtë që një fëmijë mund ta kuptonte: marrëdhënia nuk po funksiononte dhe prindërit nuk po merreshin vesh më me njëri-tjetrin.

Megjithatë, vajza këmbënguli me një tjetër pyetje plot shpresë: “Po ju mund ta rregulloni?”. Përgjigjja e Sarës ishte e prerë, por e mbushur me kujdesin e nevojshëm për ta bërë vajzën të ndihej e sigurt. Ajo i shpjegoi se kishin tentuar ta rregullonin raportin, por nuk kishte funksionuar, duke theksuar se vendimi më i mirë ishte për të gjithë, përfshirë Poem, atë dhe Ledrin.

Në përfundim, Sara theksoi rëndësinë e komunikimit të hapur me fëmijët në raste të tilla, duke u shprehur se sa më qartë të shpjegohet situata një fëmije, aq më e shëndetshme është për perceptimin dhe pranimin e realitetit, duke shmangur stresin emocional apo shqetësimet e panevojshme.