Sot është afati i fundit për regjistrimin e votuesve nga diaspora për zgjedhjet e parakohshme që do të mbahen më 7 qershor në Kosovë. Procesi i regjistrimit ka nisur më 6 maj dhe përfundon zyrtarisht sot, më 17 maj 2026.

Qytetarët që jetojnë jashtë vendit kanë mundësi të votojnë në dy mënyra: përmes postës ose në përfaqësitë diplomatike të Kosovës.

Sipas afateve të përcaktuara, votimi me postë do të zhvillohet nga 25 maji deri më 6 qershor, ndërsa votimi në përfaqësitë diplomatike do të mbahet një ditë para zgjedhjeve, më 6 qershor, nga ora 07:00 deri në 19:00.

Thirrje për verifikim të listave zgjedhore

Komisioni Qendror i Zgjedhjeve i Kosovës ka bërë thirrje për qytetarët që të verifikojnë qendrën e tyre të votimit dhe të përfundojnë procedurat brenda afateve të përcaktuara.

Sipas njoftimit të KQZ-së, qytetarëve u kanë mbetur vetëm edhe pak orë për të ndryshuar qendrën e votimit brenda komunës së tyre, pasi afati mbyllet sot.

“Verifiko Qendrën tënde të Votimit”, thuhet në thirrjen e institucionit, duke theksuar rëndësinë e respektimit të afateve ligjore.

Lista preliminare dhe kandidatët

KQZ ka miratuar Listën Preliminare të Votuesve për këto zgjedhje, e cila përfshin 2,092,202 votues, rreth 15,912 më shumë krahasuar me zgjedhjet e mëparshme.

Po ashtu, është certifikuar edhe lista me 902 kandidatë për deputetë nga 21 subjekte politike, të cilët do të garojnë në zgjedhjet e 7 qershorit.